Imajen/Espesiál.

DILI, 31 maiu 2021 (TATOLI)—Parlamentu Nasionál (PN) segunda ne’e aprova projetu-rezolusaun hodi ezije diálogu entre golpe militár ho Partidu Liga Nasionál ba Demokrasia (NLD-sigla inglés) atu hala’o diálogu hodi solusiona inserteza polítiku ne’ebé akontese iha Burma.

Ho situasaun polítiku ne’ebé akontese tinan 2020 liubá to’o oras ne’e seidauk iha solusaun, Parlamentu Nasionál Timor-Leste aprova projetu-rezolusaun ne’e hodi ezije diálogu entre parte rua no husu komunidade internasionál apoia solusaun ba povu Burma tanba povu Burma (Myanmar) terus liu ona.

Votasaun ba projetu-rezolusaun Parlamentu Nasionál nian ho númeru 74/V(3a) kona-ba situasaun Myanmar aprovadu ho rezultadu votasaun a-favór 51 kontra 0 no abstensaun 1.

“Nune’e, projetu-rezolusaun númeru 74/V(3a) aprovadu,” Prezidente Parlamentu Nasionál ein-ezersísiu atuál Vise-Prezidente Parlamentu Nasionál, Deputada Maria Angelina Lopes Sarmento, anunsia liuhosi plenária Parlamentu Nasionál.

Deputada Maria Angelina hateten, projetu-rezolusaun ne’e nu’udar jestu parlamentu Timor-Leste hodi fó solidariedade ba povu iha Myanmr ne’ebé hasoru golpe militár.

Parlamentu Nasionál reitera projetu-rezolusaun tanba dezenvolvimenu polítiku ne’ebé oras ne’e akontese iha Myanmar halo povu susar ba ai-haan, povu barak mak mate no komunidade Rohingya barak mak hetan torturasaun no mate iha situasaun ne’e.

Parlamentu Nasionál aprova projetu-rezolusaun ne’e inspira hosi prinsípiu no valór imperativa karta Orgazisaun Nasaun Unida (ONU) no Deklarasaun Universál Direitu Umanu 1948.

Parlamentu Nasionál reitera, Repúblika Demokrátika Timor-Leste, relasaun ho povu rai ida-ne’e ho povu nasaun seluk di’ak tebes, tanba ne’e presiza promosaun amizade no kooperasaun, atu iha solusaun pasífika kualkér tipu konflitu iha mundu, favorese rekursu ba multilateralizmu nu’udar forma hodi fó solusaum.

Parlamentu Nasionál mós manifesta profunda preokupasaun ho deklarasaun estadu emerjénsia iha Myanmar, ne’ebé hahú iha 01 fevereiru 2021.

Parlamentu Timorense subliña importánsia apoia kontinuasaun ba diálogu internu no rekonsiliasaun ho vontade no interese povu Myanmar nian.

Parlamentu Nasionál reitera, presiza apoia organizasaun rejionál, espesialmente Asosisaun Nasaun iha Sudeste Aziátiku (ASEAN-sigla inglés) no valoriza multilateralizmu nu’udar forma rezolusaun ka rezolve konflitu iha Myanmar.

Bazea ba Konstiutisaun RDTL artigu 92 Parlamentu Nasionál aprova projetu-rezolusaun ne’e ho pontu hamutuk ualu (8):

  1. Parlamentu Nasional Timor-Leste nian preokupa ho dezenvolvimentu polítiku iha Myanmar iha sekuénsia deklarasaun estadu emerjénasia ne’ebé hahú hosi 01 fevereiru no evolusaun situasaun polítika no sekuritária iha nasaun refere.
  2. Esporta aplikasaun prinsípiu fundamentál Estadu Direitu, dezignadamente ba prinsípiu prezunsaun inosénsia no relasaun detensaun ba sidadaun sira, observasaun imperativa ba limite impostu hosi Deklarasaun Universál Direitu Umanu.
  3. Husu rejiaun hotu teke apoia másima kontensaun hodi husu hapara violénsia, no enkoraja prosekusaun diálogu konstrutiva no konsiliatóriu iha interese povu Myanmar nian.
  4. Reitera ba organizasaun rejionál, partikulár ASEAN, atu halo promosaun boa governasaun, aplikasaun prinsípiu demokrátiku, respeita ba liberdade fundamentál sira, promosaun no protesaun direitu umanu.
  5. Parlamentu Nasionál motiva ASEAN halo promosaun abordajen ida ho ativa iha ba krize ho baze interese no buka kompromisu konstrutiva ne’ebé kontribui hodi reafirma kompromisu ASEAN iha área defeza nian liuliu kooperasaun multilaterál, bazeia ba direitu internasionál hodi alkansa pás, seguransa, estabilidade no prosperidade Myanmar nian iha rejiaun ida-ne’e.
  6. Apoia no sauda objetivu ne’ebé konsagrada iha “Consenso de Cinco Pontos”, ne’ebé deklara hosi reuniaun líder ASEAN nian iha loron 24 abríl 2021 ba povu Myanmar.
  7. Apela asesu umanitáriu tenke ho kondisaun di’ak ba sidadaun hotu iha rejiaun Myanmar nian, sein kualkér ezekusaun.
  8. Parlamentu Nasionál enkarrega ba Governu liuhosi kanál diplomátiku abituál sira atu transmite liuhosi prezente rezolusaun ne’e ba Governu no Parlamentu Myanmar nian, ba Sekretáriu Jerál ONU no Sekretáriu Jerál ASEAN nian.

Proponente ba projetu-rezolusaun ne’e mai hosi Deputadu José Agostinho Siqueira ‘Somotxo’, Silvino Morais, Francisco Miranda Branco, António Verdiál de Sousa, Deputada Maria Angelina Lopes Sarmento no David ‘Mandati’ Dias Ximenes.

Situasaun inserteza polítiku iha Burma ne’e akontese tanba Partidu Liga Nasionál ba Demokrasia liderada Aung San Suu Kyi manán tiha eleisaun jerál maibé Jendéral Min Aung Hlaing lidera golpe militár hodi hadau podér no hatama líder NLD nian ba kadeia.

Ho pozisaun Jenderál Min Aung Hlaing ne’e halo komunidade internasionál inklui Organizasaun Nasaun Unida (ONU) kondena maka’as aktu ne’e.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here