Primeiru-Ministru, Taur Matan Ruak, prezide reuniaun Konsellu Ministru extraordinaria, iha salaun Ministériu Finansa, Aitarak-laran, segunda (31/05). Imajen TATOLI/Egas Cristóvão

DILI, 31 maiu 2021 (TATOLI)–Governu liuhosi reuniaun extraordinária Konsellu Ministru (KM), halo analiza ba aprezentasaun ekipa Sala Situasaun, Sentru Integradu Jestaun Krize (CIGC, sigla portugés), kona-ba pontu situasaun epidemiolójika país nian, no ikus mai deside sidadaun ho sertifikasaun vasina kompleta bele livre halo sirkulasaun sein halo teste.

Desizaun ne’e liuhosi aprovasaun medida ezekusaun deklarasaun Estadu Emerjénsia (EE), hosi Dekretu Prezidente Repúblika númeru 35/2021, loron 28 maiu, hodi hatán ba pandemia COVID-19.

EE da-XIV abranje territóriu nasionál tomak no vigora hosi tuku 00:00 loron 02 juñu 2021 to’o tuku 23:59 loron 01 jullu 2021.

“Sidadaun sira ne’ebé hetan vasina dala-rua, sei bele dezloka livremente bá-mai, tantu iha Dili laran no bá munisípiu sira. Maibé atu halo dezlokasaun presiza hatudu kartaun vasina no husu nafatin atu tuir protokolu saúde hanesan uza máskara no kumpre distansiamentu sira,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha salaun auditóriu Ministériu Finansa (MF), Aitarak-laran, segunda ne’e.

Notísia relevante: Governu deklara sidadaun simu vasina kompleta livre sirkulasaun sein teste

Tuir governante ne’e, kestaun ne’e importante tanba maioria populasaun seidauk hetan vasina.

“Tanba ne’e, bainhira maioria hetan ona vasina maka ita bele iha imunidade koletiva hodi relaxa regra sira kona-ba tau máskara no distansiamentu, maibé pur enkuantu seidauk,” nia akresenta.

Medida ezekusaun deklarasaun EE, rejista alterasaun balun hodi estabelese katak individuu sira ne’ebé ho sertifikasaun vasina kompleta kontra COVID-19, bele sirkula livre iha territóriu tomak, inklui munisípiu sira ne’ebé impoin serka sanitária no konfinamentu domisiliáriu no regra seluk mak mantein nafatin distánsia pelumenus metru ida ho ema seluk ne’ebé la’ós família.

“Kontinua obriga atu utiliza máskara oin nian, ne’ebé taka inus no ibun bainhira hakarak tama ka hela iha fatin públiku ka privadu no fase liman bainhira hakarak tama ba estabelesimentu komersiál, industriál ka prestasaun servisu ka edifísiu servisu administrasaun públika. Ema hotu iha obrigasaun mós atu  evita halibur-malu iha dalan públiku,” Portavóz Governu subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here