Diretór Ezekutivu no Prezidente AMRT, HAMAR Antoninho Baptista Alves. Imajen/Dok

DILI, 31 maiu 2021 (TATOLI) – Diretór Ezekutivu no Prezidente Arkivu Muzeu Rezisténsia Timor-Leste (AMRT), “HAMAR” Antoninho Batista Alves, informa katak AMRT halo ona estimasaun orsamentu ba konstrusaun jardín foun Chama Eterna iha área Muzeu Rezisténsia no jardín Foho Loelaku, Postu Administrativu Kailaku, Munisípiu Bobonaro, inklui reabilitasaun estrada sei gasta millaun $20-resin.

Notísia Relevante : Pandemia COVID-19, AMRT la selebra loron mundiál ba muzeu nian

“AMRT nia estimasaun orsamentu ba konstrusaun jardín rua ne’e purvolta millaun $20. Jardín foun iha AMRT oin ne’e inklui konseitu dezeñu báziku  ami prevee ona $5.000,000-resin. Jardín Loelaku, Postu Kailaku, Bobonaro, ami prevee $3.000,000 no reabilitasaun estrada husi foho Loelaku hun ba to’o leten ami prevee orsamentu purvolta  $12.000,000,” Diretór AMRT, “HAMAR” Antoninho Batista Alves, hateten  ba Agência Tatoli iha Muzeu Rezisténsia, Dili, segunda ne’e.

Estimasaun orsamentu AMRT fó ne’e,  HAMAR argumenta katak dala ruma bele iha mudansa kustu uitoan kuandu hetan ona aprovasaun finál hosi Obra Públiku, inklui ADN (Ajénsia Dezenvolvimentu Nasionál) no Sekretariadu Grande Projetu. Tanba AMRT iha ona planu master rua mak hetan ona konsiderasaun ba finalizasaun detallu enjeñaria no dezeñu.

Nia esplika planu master dahuluk kona-bá jardín foun iha Muzeu Rezisténsia oin ne’e hetan ona konsiderasaun intermus konseitu dezeñu hosi alta entidades hotu no tinan-ne’e sei hakat tan ba prosesu konstrusaun. Planu mestre ne’e AMRT aprezenta dezde 2015.

Tuir HAMAR katak planu konstrusaun jardín foun iha muzeu oin antes ne’e iha ona serimónia lansamentu fatuk inan (primeira pedra) bainhira selebra aniversáriu tinan-40 FALINTIL nian no nia hatutan, loloos lansamentu hotu tama kedan faze implementasaun, maibé kestaun tékniku dada hela to’o agora.

Nia afirma tan, planu konstrusaun jardín Foho Loelaku, Postu Administrativu Kailaku, Munisípiu Bobonaro, hetan ona konsiderasaun hosi KAFI (Konsellu Administrativu Fundu Infraestrutura), planu ne’e mai hosi inisiativa veteranu rejiaun IV nian tanba konsidera foho ne’e iha istória ba ukun rasik an.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here