Osan Dolar Amerikanu. Imajen/Espesiál

DILI, 31 maiu 2021 (TATOLI)--Parlamentu Nasionál (PN) liuhosi Komisaun D ne’ebé trata asuntu Ekonómia no Dezenvolvimentu, husu ba Governu atu kontinua investe ka kapitaliza Banku Nasionál Komérsiu Timor-Leste (BNCTL) atu fó kréditu ba setór privadu sira hodi halo negósiu.

“Rekomenda ba Governu kontinua kapitaliza BNCTL hodi nune’e setór privadu no empresa sira bele asesu  kréditu no husu banku  atu redúz kritériu kréditu, ho kontrolu ne’ebé rigór,” Prezidente Komisaun D, Antoninho Biaco, hateten bainhira aprezenta relatóriu vizita traballu ba Autoridade Inspesaun no Fiskalizasaun ba Atividade Ekonómika, Sanitária no Alimentár (AIFAESA)  no  Servisu Rejistrasaun no Verifikasaun Emprezariál (SERVE), iha sala plenária PN, segunda ne’e.

Notísia relevante: PD propoin aumenta millaun $40 kapitaliza BNCTL

Tuir nia, fundu ne’ebé agora Governu tau iha BNCTL kiik tebes, ho kritériu maka’as liu, tanba ne’e empreza sira susar atu asesu ba kréditu.

Tuir dadus SERVE, to’o 31 dezembru 2020 konsege rejista empreza foun hamutuk 31.000, kompostu hosi tipu empreza hanesan ENI, Unipesoál Lda, porqunatos Lda, Sosiál anónimo Lda, empreza públika, no empreza internasionál.

Hosi totál empreza 31.000 (98%) mak empreza nasionál no empreza internasionál hamutuk 100 ho 2%.

“Emprezáriu 31.000 ne’e mesak timor-oan de’it, maibé barak mak la la’o tanba kapitál laiha, nune’e presiza kapitaliza BNCTL atubele fó kréditu ba empreza sira ho kritériu no burokrasi di’ak,” nia akresenta.

Aleinde ne’e, Komisaun D mós husu ba Governu atu kontinua fó formasaun ba empreza sira ne’ebé rejistu hafoin fó sertifikadu ka lisensa atu hala’o atividade ekonómika.

Tuir Deputadu Bankada Governu ne’e, atu hasa’e taxa ba empreza sira ne’ebé halo atividade ekonómika, presiza halo revizasaun ba lejislasaun hanesan lei sosiedade komersiál tanba ladún kondiz ho situasaun atuál iha Timor-Leste nia ambiente negósiu tanba tarifa taxa ho 10%.

“Rekomenda ba Governu, atu tau iha konsiderasaun  ba armonizasaun lejislasaun balun hanesan lei sosiedade komersiál, dekretu-lei lisensiamentu atividade ekonómika no dekretu-lei rejistu komersiál ne’ebé ladun kondis ona ho situasaun agora,” Deputadu Bankada FRETILIN ne’e rekomenda.

Komisaun D mós husu ba Governu atu tau konsiderasaun iha planu orsamentu hodi konstrui edífisiu foun ba SERVE, tanba durante ne’e aluga hela no kada fulan selu ho montante $10.500.

Iha Orsamentu Jerál Estadu (OJE) 2021, Governu kapitaliza BNCTL hamutuk millaun $40 atu fó empréstimu ba ema no emperza sira, nune’e evita labele monu ba falénsia no sei estimula entidade hirak ne’e atu foti empréstimu hodi sustenta kompra, traballadór no halo investimentu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here