Dieter Jerál Ministériu Solidaridade Sosiál no Inkluzaun (MSSI), Rui Manuel Gago Exposto.Imajen Tatoli/Osória Marques.

DILI, 31 maiu 2021 (TATOLI)—Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, hateten Governu liuhosi MSSI sei la estende tan tempu ba benefisiáriu la elizível ba subsídiu $200 ne’ebé simu liu tiha ona osan atu re-depozita osan ba kofre Estadu.

Notísia Relevante: Mekanizmu devolve subsídiu $200, CAC-MSSI koordena ona ho BNCTL

Rui Manuel Gago Exposto hatutan, efeitu sira hosi implementasaun regra kona-ba Estadu Emerjénsia, Serka Sanitária no Konfinamentu Domisiliáriu iha fulan hirak ikus ne’e, mak Governu servisu hamutuk ho Comissão Antí Corrupção (CAC) no Banco Nacional de Comércio de Timor-Leste (BNCTL) mak uluk deside estende tan prosesu ne’e ba fulan tolu (3) ne’ebé hahú hosi 01 abril to’o 30 juñu 2021.

“Ami sei la estende tan tempu. Bainhira to’o iha 30 juñu 2021, benefisiáriu la elizível ba subsídiu $200 ne’ebé simu tiha ona osan mak seidauk devolve ka re-depozita osan tuir mekanizmu ne’ebé estabelese liuhosi BNCTL mak prosesu sei integra ba CAC hodi halo ezersisíu seluk tuir lei haruka,” Rui Exposto hateten ba jornalista sira, liuhosi konferénsia imprensa, iha MSSI Caicoli, Dili, segunda ne’e.

Diretór ne’e fó hanoin hikas fali ba funsionáriu no traballadór sira ne’ebé la elezível ba programa apoiu subsídiu $200 ba agregadu familiar ne’ebé simu ona osan, atu develove fali osan ne’e ba Kofre Estadu liuhosi BNCTL ninia sukursál-sira iha territóriu nasionál.

Governu hasai tiha ona sirkulár ida ba ministériu hotu hodi halo koordenasaun ho BNCTL atu re-depozita fali osan $200 ne’e ba BNCTL, maibé prosesu ne’e hasoru difikuldade tanba lahetan informasaun adekuada ba nia mekanizmu atu oinsá re-depozita.

MSSI no CAC konsidera katak tempu estensaun ne’e sufisiente ona ne’ebé hahú hosi 01 abríl to’o 30 juñu 2021, no sei laiha tan nesesidade atu estende tanba MSSI sei finaliza relatóriu hodi submete ba Ministériu Finansa.

Nia informa, durante ne’e benefisiáriu la elizível na’in ualu (8) mak re-depozita ona osan ba Ministériu Solidariedade Sosiál (MSSI) maibé benefisiáriu sira-ne’ebé reodepozita osan liuhosi BNCTL seidauk iha klareza tanba BNCTL seiduak fó relatóriu.

Entretantu, Adjuntu Komisáriu CAC ba Prevensaun no Sensibiliizasaun, Luís de Oliveira Sampaio hateten karik benefisiáriu la elizível mak la devolve osan ba kofre Estadu mak sei iha dalan seluk hodi halo investigasaun ba sira.

“Agora ne’e servisu liga ho prevensaun entaun halo akonseliamentu ho sira no fó hanoin ba sira, nune’e kolabora hodi devolve osan. Ita mós hatene katak situasaun ne’e todan duni maibé ita fó tempu fulan neen ona. Kuandu sira la koordena no la halo aproximasaun ho ekipa prevensaun ninian mak ami sei entrega ba dirasaun seluk ne’ebé servisu ligasaun ho investigasaun. Ida-ne’e mak sei bolu sira no prosesu hotu sei determina no sira sei ba iha ne’ebé no sira viola regra ka lei ida-ne’ebé,” nia hateten.

Durante ne’e CAC trava ona ema kuaze 1.927 ne’ebé kálkulu ba osan $385.400 hanesan ne’e, maibé sira fiar katak númeru seluk ne’ebé boot liu númeru ida-ne’e tanba rekursu limitadu.

Notísia Relevante: CAC sei investiga benefisiáriu la elejivel simu subsídiu $200

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here