Brosura rejime foun kona-ba kontrolu Tabaku.

DILI, 31 maiu 2021 (TATOLI)—Durante situasaun COVID-19, hahú hosi marsu 2020 to’o ohin loron, Aliansa Nasionál Kontrolu Tabaku Timor-Leste (ANCTL sígla portugés), halo observasaun no deskobre katak, iha sigaru ho marka foun tama ilegál no sirkula iha merkadu-sira iha rai laran.

Jestór ANCTL, Sancho Belito Fernandes, konsidera situasaun ne’e akontese tanba entidade relevante-sira ne’ebé implementa lei  númeru 14/2016, 8 juñu rejime lei tabaku, la halo serbisu ho másimu no rigór liuliu la halo inspesaun regulár ba produtu tabaku.

Notísia relevante:Ema Seidauk Koñese Lei Kontrolu Tabaku

“Ami-nia monitorizasaun iha Estadu Emerjénsia dahuluk, ami identifika sigaru brand foun tama illegál la kumpri lei tabaku no ema hahú faan slop iha merkadu. Vendedór kiik-sira atu hola ida-ne’e mós laiha kontrolu no la halo inspensaun,” Sancho Belito Fernandes, hateten ba jornalista-sira iha kna’ar fatin segunda ne’e.

Maski la temi marka orijinál tabaku ilegál ne’e, maibé ANCTL konsidera kompaña tabaku-sira aproveita situasaun COVID-19 ne’ebé entidade-sira la halo serbisu ho rigór, sira aproveita halo komérsiu maski iha risku boot ba konsumendór-sira.

Hosi ne’e mós ANCTL nota katak, jeralmente implementasaun lei tabaku durante tinan haat, seidauk efetivu tanba laiha serbisu integradu.

“Ami haree dezafiu ida-ne’e mak ita-nia asesibilidade ba produtu tabaku ne’e fásil no agora-daudaun haree labarik-sira sei hola hela no ema-sira sei faan rahun. Entaun, realidade seidauk implementa loloos lei ne’e,’’ nia esplika.

Tanba ne’e, ANCTL husu atu reforsa implementasaun lei tabaku númeru 14/2016, tanba implementasaun ne’e importante.

Rekomendasaun seluk maka, tenke iha planu asaun  itegradu ida atu reforsa hosi ajénsia no setór Governu ne’ebé implementa lei ne’e, tenke iha koordenasaun di’ak, halo planu ne’ebé fixu, tanba  tabaku ne’e lori risku sériu ba ema-nia moris.

Ikus liu ANCTL  husu atu tau matan ba folin tabaku, tenki hasa’e no polítiku-sira tenki hanoin asuntu ida ne’e  tanba ema barak sai vítma ba tabaku.

Tuir dadus hosi Ministériu Saúde (MS), hatudu katak, Timoroan ho idade adultu ka tinan 20 ba leten kuaze 71% ativu konsumu tabaku.

MS mós rejista, Governu TL kada tinan tenki gasta millaun $7 atu refere Timoroan-sira ne’ebé sofre moras krónika ba halo tratamentu iha rai-liur, kauza hosi konsumu tabaku.

Notísia relevante:Timoroan ho idade adultu 71% ativu konsumu tabaku

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here