Antoni-oan sira prepara atu sa'e Ró SUCCES fila ba Rejiaun Administrativa Espesiál Oé-Cusse Ambeno (RAEOA), segunda (31/05/2021). Imajen Tatoli/Arminda Fonseca

DILI, 31 maiu 2021 (TATOLI)-Koordenadór Gabinete Zona Espesiál Ekonomia Sosiál Merkadu (ZEESM), Nilton Pereira, informa Atoni-oan ne’ebé sesta foin lalais submete ba teste swab iha Dili hatudu rezultadu na’in-14 pozitivu COVID-19.

Notísia Relevante : Atoni-oan na’in-90 teste swab molok fila ba Oé-Cusse

“Hanesan ita hotu hatene katak, sesta (28/05), ita-nia komunidade Rejiaun Administrativa Espesiál Oé-Cusse Ambeno (RAEOA), ne’ebé atu fila ba Ambeno hasai swab, rezultadu fó sai iha domingu (30/05) katak ema na’in-14 mak pozitivu ba COVID-19,” Nilton Rodrigues Pereira ba Agência Tatoli liuhosi telefónika, segunda ne’e.

Nia afirma, momentu ema ne’ebé hasai swab loloos ema na’in-90 ho razaun balu pozitivu karik atu taka malu, maibé la konsege to’o ema na’in-90 tanba momentu ne’e balu la marka prezensa, nune’e ema ne’ebé hasai swab ne’e hamutuk 83 de’it no rezultadu na’in-14 mak pozitivu COVID-19.

Nia hatutan, ba komunidade ne’ebé pozitivu ba COVID-19, halo tuir protokolu Organizasaun Mundiál Saúde (OMS) nian hodi submete ona ba izolamentu, no ohin, ne’e sira ne’ebé rezultadu negativu mak  halo viajen ba RAEOA ho Ró SUCCESS.

“Sira ne’ebé agora atu halo viajen ba RAEOA loloos hamutuk ema na’in-69 tanba na’in 14 pozitivu ba COVID-19, maibé tanba maluk balu rekoopera hosi COVID-19 hetan karta viajen nian no balu na’in rasik ba halo teste swab iha Sentru Integradu Jestaun Krize (CIGC-sigla portugés) mai taka fali sira ne’ebé pozitivu nia fatin, hamutuk 74 mak fila ba RAEOA,” nia dehan.

Nia subliña, sira na’in-74 ne’ebé daudaun fila ona ba RAEOA, sei tama hotu kuarentena no semana ida, sei halo fila-fali teste swab, tanba ho razaun hakarak sira hotu-hotu tenke livre hosi COVID-19 molok ida-idak fila ba sira-nia hela fatin.

Portavós Movimentu Atoni-oan, Zecafriado Afulit Coa hateten, nia parte kontente tanba daudaun ne’e Prezidente Autoridade RAEOA hatán ona sira-nia preokupasaun ne’ebé durante ne’e hakarak fila ba Ambeno.

“Ha’u kontente tanba ami-nia preokupasaun no terus ne’ebé durante ne’e ami hasoru agora iha ona dalan, maske Atoni-oan hotu-hotu seidauk ba, maibé ida ne’e prosesu mak hanesan ne’e tanba ne’e husu nafatin Prezidente RAEOA, hadomi ami hanesan Oé-Cusse oan no labele halo diskriminasaun,” Zecafriado Afulit Coa hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here