Prezidente Repúblika, Francisco Guterres ‘Lú Olo’. Imajen TATOLI/Egas Cristóvão

DILI, 30 maiu 2021 (TATOLI)—Prezidente Repúblika (PR), Francisco Guterres ‘Lú Olo’ husu entidade hotu atu kumpre medida ezekusaun Estadu Emerjénsia tanba preokupa tebes ho númeru kazu konfirmadu COVID-19 ne’ebé kada loron sa’e ba beibeik.

“Figura públika ho responsabilidade, labele hateten hadomi povu no preokupa ho moris di’ak no saúde povu, maibé la kumpre regra bázika protesaun hanesan distansiamentu sosiál no uza máskara ka la respeita konfinamentu domisiliáriu, ho motivu ne’ebé de’it ka ho hanoin ba sira nia-an deit,” Xefe Estadu dehan liuhosi nota ne’ebé Agência TATOLI asesu, domingu ne’e.

Notísia relevante: PN autoriza PR dekreta estadu emerjénsia ba dala-XIV

PR nota katak, maski iha períodu Estadu Emerjénsia, maibé iha entidade balun kontinua halibur ho populasaun iha fatin públiku lahó máskara no laiha distansiamentu fíziku, ne’ebé sei la kontribui atu hapara vírus, maibé sei loke dalan atu hadaet liután hosi ema ba ema.

“Prezidente Repúblika preokupa tebes bainhira populasaun la respeita pesoál saúde ne’ebé tau matan no proteje sidadaun loron-loron, nune’e iha futuru saida mak país ne’e sei iha bainhira ema la respeita forsa defeza no seguransa? Futuru saída mak ita sei hetan ba foin-sae sira ne’ebé fila kotuk ba siénsia no monu lalais de’it ba teoria nega de’it no ba konspirasaun no rumor ne’ebé sira lee iha rede sosiál sosiál?,” Xefe Estadu akresenta.

Nune’e, PR husu ba populasaun atu iha konsiénsi, katak sei iha implementasaun konfinamentu domisiliáriu obrigatóriu jerál, tanba ne’e maski iha figura públika ida halibur ema barak, presiza hatene obrigasaun nu’udár sidadaun atu kumpre regra ne’ebé estabelese ona.

“Repúblika Demokrátika Timor-Leste hatuur-an nu’udár Estadu Direitu Demokrátiku, soberanu, independente no unitáriu, bazeia ba vontade populár no respeitu ba dignidade ema-nia tuir númeru 1 artigu 1 husi Konstituisaun, tanba ne’e bainhira la respeita órden no instrusaun hosi autoridade kompetente, hodi aplika norma implementasaun Estadu Emerjénsia, labele haree de’it ho perspetiva responsabilidade penál hosi nia infratór sira,” nia subliña.

Tuir Lú Olo, bainhira sidadaun sira loke dalan nafatin atu la halo tuir medida implementasaun Estadu Emerjénsia, maka Estadu Direitu Demokrátiku ne’e em causa.

“Ita tenke proteje Estadu Direitu Demokrátiku no kombate ameasa hotu ne’ebé mosu hasoru Estadu ne’e, tanba ne’e bainhira ita fó dalan ba ema la respeita direitu, maka ita sei permite barbarizmu moris,” nia hatutan.

Xefe Estadu preokupa tebes ho númeru kazu konfirmadu COVID-19 ne’ebé kada loron sa’e ba beibeik.

“Situasaun iha Timor-Leste preokupante tebes ohin loron, bainhira Prezidente Repúblika hato’o mensajen ba Parlamentu Nasionál, Timor-Leste iha hela kazu  ativu konfirmadu 2.666 hosi totál rejistadu 6.014, sura hamutuk hosi marsu 2020 no ema na’in-14 mak mate,” PR reforsa.

PR dehan, Governu labele hases-an hosi sasukat ka medida ne’ebé Xefe Estadu dekreta no labele husik grupu ne’ebé de’it  hasees-an no la respeita medida sira.

“Governu labele eziji atu taka tipu estabelesimentu komersiál ruma no husik estabelesimentu balun hosi tipu hanesan, kontinua loke nafatin ba públiku. Governu labele dekreta konfinamentu domisiliáriu jerál  maibé husik fali ema irresponsável sira halo prátika desportu, partisipa iha konsertu muzikál, halo serenata  kalan, ka la’o bá-mai iha ema hotu nia oin no Polísia haree deit,” Xefe Estadu tenik.

Tanba ne’e, PR otimizta ho apoiu entidade hotu, Timor-Leste sei hakaat liu dezafiu boot no difísil, tanba istória Timor-Leste hanesan ezemplu katak  bainhira hamutuk, bele hakaat liu dezafiu.

Estadu Emerjénsia da-XIV hahú hosi oras 00:00 loron 02 juñu (kuarta) to’o oras 23:59 loron 01 jullu 2021 (kinta), iha territóriu nasionál tomak.

Jornalista: Osória Marques

Editora: Julia Chatarina

HAKEREK NO HATÁN

Please enter your comment!
Please enter your name here