Osan Dolar Amerikanu. Imajen/Espesiál

DILI, 30 maiu 2021 (TATOLI)—Ministru Petróleu no Minerál, Víctor da Conceição Soares, hateten, iha Lei Kódigu Minieru ne’ebé Parlamentu Nasionál (PN) aprova ona, iha anexu balun fó dalan kria Lei Fundu Mineiru própriu hodi rai reseita rekursu minerál bainhira dezenvolve ona.

“Ha’u hanoin interese Estadu no nasaun mak ne’e, ami hein Prezidente Repúblika promulga Kódigu Mineiru, maka Governu no Parlamentu Nasionál hahú diskute ezbosu Fundu Mineiru,” Ministru Víctor, hateten ba Agência TATOLI, iha edifísiu Ministériu Finansa, Aitarak-Laran, domingu ne’e.

Notísia relevante: MPM pleneia kria lei fundu mineiru

Tuir governante ne’e, razaun Governu presiza kria fundu iha setór mineiru tanba haree Timor-Leste iha potensialidade rekursu minerál no tuir estudu viabilidade hatudu ekonomikamente viável hatama reseita.

“Ita presiza halo Lei Fundu Mineiru atu rai ketak reseita hosi investimentu mineiru nia, hanesan mós ho fundu petrolíferu, ne’ebé atu halo levantamentu presiza hetan aprovasaun Parlamentu Nasionál,” nia akresenta.

Nia dehan, lejizlasaun ne’e atu asegura fonte finanseiru bainhira iha ona produsaun hodi hatama reseita ba kofre Estadu.

Antes ne’e, ANPM halo ona estudu barak hodi indentifika potesialidade rekursu mineiru iha rai maran hanesan iha osan mean, mutin, maganés, mármore, no seluk tan.

Aleinde ne’e, autoridade mós asina ona kontratu ho kompañia Elegant Marbele Group Unip. Limitada (EMG) no Kompañia Lokál Uma Marble Timor (UMT), Lda atu halo estudu ka peskiza mármore iha suku Uma-kaduak, postu adminsitrativu Laclo, munisípiu Manatuto.

Enkuantu, Projetu-Lei númeru 4/V(1a) Kódigu Mineiru aprovadu ona iha finál global, iha loron 24 maiu 2021, ho rezultadu votasaun a-favór 56, laiha kontra no abstensaun.

Jornalista: Florêncio Miranda Ximens

Editora: Julia Chatarina

HAKEREK NO HATÁN

Please enter your comment!
Please enter your name here