Ekipa Saúde na Família halo teste swab iha munisípiu Dili, sesta (07/05). Imajen TATOLI/António Gonçalves

DILI, 30 maiu 2021 (TATOLI)—Koordenadór Forsa-Tarefa ba Prevensaun   no Mitigasaun Surtu COVID-19 iha Timor-Leste, Rui Maria de Araújo, husu ba públiku bainhira sente iha sintoma, tenke submete ba teste swab.

“Bainhira sente isin-manas, mear, kakorok moras ka sintoma seluk tan, bele bá konsulta iha Sentru Saúde ne’ebé besik atubele halo teste swab,” Koordenadór apela liuhosi nota ne’ebé Agência TATOLI asesu, domingu ne’e.

Nia dehan, bainhira atu husu autorizasaun esesionál sai hosi serka sanitária iha Dili, bele bá halo swab iha Sentru Konvensaun Dili (CCD, sigla portugés).

Nune’e mós, bainhira sente iha kontaktu besik ho ema ruma ne’ebé detetadu pozitivu ona no seidauk hetan kontaktu hosi ekipa konjunta saúde, bele liga ba numeru 119 atu organiza halo teste swab.

Aleinde ne’e, ekipa Saúde na Familia (SnF) iha Sentru Saúde sira iha Dili halo vizita bá bairru ho aldeia ne’ebé detetadu kazu barak ona.

“Sira ne’ebé iha sintoma ka sente kontaktu besik ho kazu pozitivu ruma, bele hakbesik hodi halo teste,” nia akresenta.

CIGC mós apela ba populasaun iha Dili laran inklui iha munisípiu sira seluk, atu aprezenta-an iha fasilidade saúde públika hanesan Sentru Saúde ka Ospitál ne’ebé besik, bainhira sente iha sintoma, nune’e bele hetan atendimentu hosi profisionál saúde sira.

“Bainhira sedu liu hatene karik vírus ne’e kona ita ka la’e, di’ak liu hodi nune’e bele hetan atendimentu sedu no prevene tama ba situasaun hanaran sindroma insufisiénsia respiratória aguda (SIRA) ka susar/difísil dada-iis,” Koordenadór subliña.

Biban ne’e, Reprezentante CIGC husu ba populasaun Timor-Leste laran tomak, hodi respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et bá-mai.

“Regra sira ne’e mak hanesan uza máskara, fase liman beibeik ho sabaun ka dezinfetante ruma, evita kose liman ba matan, inus ho ibun, bainhira kumprimenta malu la presiza ka’er liman, bensa-liman, rei-malu ka hako’ak malu, evita halibur malu barak, hamriik ka tur dook hosi ema seluk mínimu metru ida ho balun,” nia fó hanoin.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here