Koordenadór Forsa-Tarefa ba Prevensaun no Mitigasaun surtu COVID-19 iha Timor-Leste, hosi Sala Situasaun CIGC, Rui Maria de Araújo. Imajen TATOLI/Egas Cristóvão.

DILI, 29  maiu 2021 (TATOLI)—Sala Situasaun, Sentru Integradu Jestaun Krize (SS-CIGC, sigla portugés), sábadu ne’e, relata katak dadus COVID-19 ba loron ohin nian, rejista kazu obitu ida,    pozitivu 130,  rekuperadu 132 no kazu ativu 2.689.

Notísia Relevante : COVID-19: pozitivu 163, rekoperadu 198 no ativu 2.692

“Óbitu (mate) ne’ebé relata ohin, 29 maiu 2021, ho detallu hanesan tuir mai; mane, idade tinan 38, Timor-oan, hela iha aldeia 4 Setembru, Suku Comoro, Postu Administrativu Don Aleixo, Munísipu Dli, horiseik dadeer 11H00 ba konsulta iha Sentru Saúde Comoro ho sintoma isin-manas ho iis-boot. Matebian iha mós istória Diabetes,’’ koordenadór Forsa-Tarefa ba Prevensaun no Mitigasaun, Rui Maria de Araújo hateten liuhosi komunikadu imprensa ne’ebé Agência Tatoli asesu hosi SIJK, sábadu  ne’e.

Liuhosi komunikadu ne’e Rui Araújo esklarese katak  Rapid swab antigen test ne’ebé halo iha Sentru Saúde Comoro hatudu rezultadu pozitivu ekipa saúde iha Sentru Saúde Comoro konvense atu haruka ba halo tratamentu iha fatin izolamentu Vera Cruz, maibé matebian ho família rekuza no obriga-an fila ba uma. Nune’e, horikalan Xefe Sentru Saúde Comoro simu informasaun hosi membru família ida katak matebian iis-kotu maizumenus iha tuku 17:00 Otl, no família la aseita atu halo funeral tuir protokolu ba COVID-19.

“Kazu foun ohin 130 mai hosi Dili 111 no munisípiu-sira iha 19, ne’ebé kompostu hosi mane 73 no  feto 57. Hosi totál kazu detetadu foun, ohin, ho idade 12 mai kraik iha na’in-haat   ho idade entre tinan 12-59 na’in 121 (93,0%), idade 60 mai kraik iha na’in-lima (5) ne’ebé proporsaun kazu sintomátiku hamutuk 4,6%,” Rui Araújo informa liuhosi komunikadu ne’e.

Kumulativu kazu konfirmadu sura hosi 21 marsu 2020 to’o 29 maiu 2021 hamutuk 6.752. Hosi horisehik mai ohin, teste ne’ebé Laboratóriu Nasionál Saúde halo hamutuk 1.244 PCR, ho detallu hanesan tuir-mai, Vijilánsia sentinela 40, rastreiu ba kontaktu ka Contact tracing  118, Rastreiu Aleatóriu  ka Random Screening 432, viajen sai-hosi serka sanitária hosi Dili 638, viajen internasionál  la iha, follow-up iha kuarentena 19.

Totál testes PCR ne’ebé halo horisehik 28 maiu iha Munisipiu-sira seluk, RAEOA no HNGV hamutuk 565,  ho  detalla hanesan tuir-mai, Maubisse 118, Maliana 58, Viqueque  10, Suai 88,  Baucau 67, Ermera 111, RAEOA  28 , HNGV 85.

Atu bele hatene surtu ida ninia evolusaun no mós surtu ne’e aumenta ka diminui, indikadór seluk ne’ebé matenek-nain epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et  moras ida.

Hosi insidénsia COVID-19 iha Timor-Leste, durante loron hitu ikus maka 13,8/100 mil abitante, enkuantu ba de’it munisípiu Dili 44,1/100 mil abitante.

Lista tuir mai hatudu valor nominal média (rata-rata) taxa insidénsia COVID-19 durante loron hitu ikus, pur munisípiu; Aileu 2.0/100 mil, Lautem 2,6/100 mil,  Ainaro 1,7/100 mil, Liquiça 0,4/100 mil, Baucau 4,0/100 mil, Manatuto 1,2/100 mil, Bobonaro 11,0/100 mil, Manufahi 0,2/100 mil, Covalima 3,6/ 100 mil, RAEOA 0,0/100 mil,  Dili 44,1/100 mil, Viqueque 1,4/100 mil, Ermera 0,1/100 mil.

Insidénsia iha leten sei nafatin hatudu katak Munisípiu Dili mak fatin ho risku boot liu atu populasaun hetan da’et no hada’et tutan virus SARS-CoV-2, tuir kedas mak Munisípiu Bobonaro ho Covalima, Baucau no Viqueque.

Informasaun hosi izolamentu

Iha 29 maiu 2021, izolamentu Vera Cruz halo tratamentu ba kazu detetadu na’in-38, iha área obstetrisia na’in-15 no iha medisina interna na’in-21, pediatria ida, neonatolojia ida,   iha obstetrisia  na’in-15 kategoria leve (mild) hotu.

Iha área medisina interna na’in-21.  Na’in  sia grave (rua iha ICU uza  CPAP,  na’in-hitu (7)  uza oksijéniu  na’in-12     moderadu, ualu  leve  (mild ) hotu). Kazu ida  iha pediatria moderadu no kazu ida iha neonatolojia leve  (mild).

Númeru kazu moderadu no grave ne’ebé baixa iha Vera Cruz hatudu  katak, bainhira ema barak liu detetadu pozitivu, barak-liu tan maka sei baixa ho kategoria moderadu no grave.

Apelu

Apela ba populasaun iha Timor-Leste laran tomak atu tuur hakmatek, kumpre ho rigór regra serka  sanitária  no konfinamentu  domisiliáriu  ne’ebé  Konsellu  Ministru  deside  ona implementa hahú 30 abríl no extende tan ona semana rua  ba oin.

Husu atu hotu-hotu kolabora  ho autoridade saúde  hodi  bele  buka-tuir  ema  hotu  ne’ebé  hetan da’et  ona virus ne’e, no izola atu labele hada’et-tutan ba ema ne’ebé seidauk hetan da’et.

Ba populasaun tomak, favór respeita nafatin regra prevensaun no ijiene individuál ne’ebé Governu hatuur ona atu prevene moras COVID-19 da’et ba mai.

Regra sira-ne’e, mak hanesan uza máskara, fase-liman beibeik ho sabaun ka uza dezinfetante ruma, evita kose-liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista       : Felicidade Ximenes

Editór             : Francisco Simões

HAKEREK NO HATÁN

Please enter your comment!
Please enter your name here