Pesoál saúde fó vasina AstraZeneca inan-feton ida iha Sentru Saúde Bairro Formosa, Dili, sesta, (21/05). Imajen TATOLI/António Gonçalves

DILI, 29 maiu 2021 (TATOLI)-Populasaun adultu iha kapitál Dili  ho porsentu (%) 30  maka simu ona vasina AstraZeneca. Maske nune’e, númeru populasaun vulneravel sei ki’ik tebes mak simu vasina AstraZeneca.

Notísia Relevante : COVID-19: pozitivu 163, rekoperadu 198 no ativu 2.692

“Hanesan parte implementasaun kampaña  vasinasaun COVID-19 iha Munisípiu Dili mak númeru kazu aas liu  tuir estimasaun  katak adultu  porsentu 30  hosi sidadaun 76.683, tinan 18 ba leten mak simu  ona vasina  COVID-19. Ita hakarak vasina ba ema sira ne’ebé mak mais veneravel, ema sira ne’ebé mak  idade 60 ba leten no  ema sira ne’ebé mak moras krónika sira,” Danina Coelho informa liuhosi konferénsia imprensa iha salaun Ministériu Solidariedade Sosiál no Inkluzaun, Dili, sábadu ne’e.

Governu Timor-Leste  anunsia  katak autoridade  saúde sira iha Timor-Leste  halo ona vasina  AstraZeneca ne’ebé apoia  hosi Governu Austrália ho kuantidade dozes  40.000.

Notísia Relevante : Sidadaun 76.683 simu ona vasina AstraZeneca doze dahuluk

“Iha periodu  semana tolu nia laran, hosi loron 10 maiu to’o 28 maiu, ema hamutuk 48.170   mak simu vasina AstraZeneca,” nia informa.

Dadus estatístika populasaun  Munisípiu Dili  nian hatudu ema sira ho idade  60  ba leten hamutuk 14.518,  maibé  foin  mak vasina  ema na’in-74.000 , entaun signifika númeru  sei ki’ik.

“Ita presiza tebes atu vasina ema  sira ne’ebé mak veneravel  tanba ita hatene katak sira mak  protesaun liu ba iha vasina ne’e,’’ Danina Coelho hateten.

Iha fatin hanesan koordenadora sub-komité  Seguransa  Vasina  Ministériu Saúde,  Josefina Clarinha João, hateten bainhira ema ne’ebé mak simu vasina  mosu iha reasaun adverse   hosi faze dahuluk to’o ohin loron, iha  sistema reportajen katak ema na’in-15 mak rejistu  mosu reasaun adverse.

“Hosi na’in-15 ne’e  iha na’in-rua mak ami konsidera reasaun maka’as, mas na’in-13 seluk hanesan reasaun moderadu,” Josefina Clarinha João tenik.

Nia hateten, ema ne’ebé simu vasina AstraZeneca barak liu mak reasaun baibain  hanesan isin-manas, isin-kolen,  laran-sa’e no ulun moras, maibé reasaun sira-ne’e mosu hemu ai-moruk paracetamol  deskansa de’it ida ne’e   bele lakon ona.

To’o ohin loron Timor-Leste rejista kazu COVID-19 hamutuk 6.622, kazu obitu hamutuk 15  no Munisípiu Dili mak rejista  kazu COVID-19 ho númeru ás.

Jornalista       : Felicidade Ximenes

Editór             : Francisco Simões

HAKEREK NO HATÁN

Please enter your comment!
Please enter your name here