Reprezentante SEPS, Isabel Ferreira, simu simbólikamente apoia hosi Embaixadór Xina iha Timor-Leste, Xiao Jiangou, iha sala V-VIP Aeroportu Comoro, sesta (28/05). Imajen/Natalino Costa

DILI, 28 maiu 2021 (TATOLI)—Governu Xina apoia vítima dezastre naturál iha 04 abríl, manta hamutuk 3.000 no sabaun herbál hamutuk 10.000, ne’ebé sasán sira to’o ohin iha Aeroportu Internasionál Prezidente Nicolau Lobato, Comoro, no simu hosi Reprezentante hosi Sekretaria Estadu Protesaun Sivíl (SEPS).

“Apoiu ne’e liga ho dezastre naturál ne’ebé akontese foin daudaun ne’e. Tanba ne’e nu’udár Embaixadór iha nosaun ba ita-nia terus no susar, ne’ebé ajuda ne’e hosi povu Xina hodi  apoia vítima inundasaun iha Timor-Leste,” Embaixadór Xina iha Timor-Leste, Xiao Jiangou, informa iha Aeroportu Compro, sesta ne’e.

Tuir Diplomata ne’e, apoia hanesan sei kontinua nafatin, ne’ebé haree ba sasán sira vítima sira ne’ebé presiza liu.

“Hafoin inundasaun, Xina apoia osan hamutuk $100.000, ne’ebé entrega ba Sekretaria Estadu Protesaun Sivil no apoia ne’e sei kontinua nafatin,” nia akresenta.

Iha fatin hanesan, Diretór Jerál SEPS, Ismael Babo, apresia apoia ne’e no agredese ba Governu no povu Xina.

“Sira mós komprometidu atu fó apoiu nafatin ba Sekretaria Estadu Protesaun Sivil no Governu Timor-Leste atu hato’o ba ita-nia populasaun sira. Apoia manta no sabaun sei mai iha etapa daruak iha semana oin, ne’ebé etapa dahuluk mak ohin to’o ona, tanba ne’e ami sei jere apoiu sira ne’e ba populasaun sira ne’ebé mak seidauk hetan apoiu,” nia hatutan.

Nune’e mós, Asesora Legál SEPS, Isabel Ferreira, agradese  ba kompromisu Governu Xina tanba sempre fó apoia ba Timor-Leste iha parte oin-oin. 

“Xina hanesan parseiru di’ak ba Timor-Leste desde tempu luta to’o ohin loron, tanba ne’e ita agradese tebes ba apoia sira ne’e,” nia dehan.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here