Serimónia hakoi mate-isin eroína Merita Alves “Bi-Ki’ak” iha Jardim dos Herois Metinaro, Dili, kinta (27/05). Imajen/Mídia PR.

DILI, 28 maiu 2021 (TATOLI)—Prezidente Repúblika, Francisco Guterres Lú Olo, hato’o mensajen solidariedade no estima ba família Alves no Araújo ne’ebé lakon ema murak tebes ida iha serimonia hakoi mate-isin Saudoza Merita Alves “Bi-Ki’ak” iha Jardim dos Herois, Metinaro, Dili, kinta (27/05) ne’e.

Notísia Relevante: PN aprova votu pezár ba saudoza Merita Alves no saudozu ‘Dusae’

Prezidente Repúblika hateten, nia parte hakarak hahí papel feto hotu-hotu nian iha luta ba libertasaun nasionál, tanba iha tempu resisténsia ne’e inimigu la preokupadu ba feto sira tanba konsidera feto ne’e fraku maibe loloos ne’e feto mak forte liu ba organiza rezisténsia iha zona inimigu nian.

“Ha’u hakarak hahí papel feto hotu-hotu nian iha luta ba libertasaun nasionál. Inimigu hanoin katak feto fraku maibé bainhira mane labele sai ba públiku tanba persege no deskonfia, feto mak sai ba públiku ezekuta atividade klandestina. Tanba la haree feto hanesan perigu boot, inimigu persege liuliu mak mane. Neebé, feto sira mak elementu forte liu ba organiza rezisténsia iha zona inimigu nian. Ho feto sira-nia dedikasaun tomak ita konsege haburas rede klandestina iha zona inimigu sira-nian,” refere Prezidente Republika nia mensajen solidariedade ne’ebé lee hosi Xefe Kaza Sívil, Francisco Maria de Vasconcelos, liuhosi komunikadu imprensa ne’ebé Agência TATOLI asesu, sesta ne’e.

Xefe Governu ne’e hatutan, iha 1998, família Alves no Araújo arriska-aan bainhira deside simu nia (Lú Olo), Ran Nakali, Detina Bagia, Soekarno no Gamoloi iha sira-nia uma iha Audian, bainhira sira tun mai hetan ho kombatente sira seluk no organiza apoiu lojístiku.

Imajen/Mídia PR.

“Iha loron ohin, halibur família Alves no Araújo, hodi hahii memória eroína Merita Alves “Bi-Ki’ak” nian, ha’u hakarak rekoñese mós família ninia apoiu ba ami iha ai-laran no ba rezisténsia tomak. Marita Alves “Bi-Ki’ak” hanesan inan, feto, alin no kamarada sei hela ita hotu nia fuan.  Ita hotu promete lori nia mehi ida-ne’e, loke dalan ba feto sira-nia emansipasaun atu bele sai parseira mane nian, iha uma, sosiedade, instituisaun públika no iha setór privadu,” Lú Olo hateten.

Tanba ne’e, Prezidente Repúblika lori família nia naran hato’o mensájen solidariedade ba família Alves no Araújo ne’ebé lakon ema di’ak ida, eroína Merita Alves “Bi-Ki’ak” iha sira-nia leet..

“Lakon ida-ne’e ita hotu sente iha ita-nia fuan tanba ita hotu hatene saída mak eroína Merita Alves halo, nu’udar Kombatente Libertasaun Nasionál, hodi ita bele hamriik ohin loron nu’udar povu ho identidade rasik moris iha País ida, ho estatutu hanesan ho País sira seluk, ne’ebé sai mós hanesan membru nasaun unida nian,” nia dehan.

Ho naran kódigu Bi-Kiak mak nia identifika-aan iha Timor-Leste funu naruk nakonu ho terus no sakrifísiu oioin, husi nia rasik, ninia kaben veteranu luta Octávio Araújo, alin sira no familia sira seluk ne’ebé tuba rai metin hamutuk ba mehi ida deit mak “Ukun rasik aan”.

Ho operasaun serku no anikilamentu hosi militár indonéziu, baze apoiu nakfera no batallaun 315 konsege kaer Merita Alves no família. Biar tun ona mai hela iha Dili, família ne’e la moris hakmatek. La’ós de’it tanba militár indonéziu hatama beibeik iha kadeia ka litik hela de’it maibé tanba lakohi husik mehi “ukun rasik aan” ne’e monu leet de’it.

Biar ho risku hetan tortura no mate, família nasionalista ne’e buka dalan oinsá deit hodi tane nafatin Timor-Leste nia mehi boot ne’e. Sira-nia uma nakfila ba núkleu prinsipál ida ba organiza rezisténsia iha Dili laran no fó abrigu ba komandante FALINTIL no líder FRETILIN. Sai mós fatin seguru ida ba simu no hasa’e informasaun ba rai-li’ur no halibur apoiu lojístiku ba Frente Armada.

Haree ba prosesu hametin rede klandestina iha Dili, Prezidente Repúblika hakarak rekoñese papel boot família Alves no Araújo nian iha organizasaun rede klandestina iha Dili laran.

Notísia Relevante: Eroína Merita Alves “Bi-Ki’ak” luta makaas ba emansipasaun feto

Joranlista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here