Segundu Komandante PNTL eskuadra Becora, Inspetór Assitente, Paulino de Carvalho ho membru Konsellu Polisiamentu Komunitária (KPK), entrega ai-han ba Marta Sequeira no Jacinta Pereira iha aldeia Lagoa Bubur-laran, suku Becora, postu administrativu Cristo Rei, munisípiu Dili. Imajen/PNTL.

DILI, 28 maiu 2021 (TATOLI)—Polísia Nasionál Timor Leste (PNTL) liu hosi eskuadra Becora, kontinua fó apoiu ai-han ba feto-faluk Marta Sequeira ho Jacinta Pereira ne’ebé idade avansada no sofre hamlaha, iha aldeia Lagoa Bubur-laran, suku Becora, postu administrativu Cristo Rei, munisípiu Dili.

Apoiu ne’ebé oferese mak hanesan, foos, mina, kafé, masin-midar no susu-been ne’ebé entrega direta hosi segundu Komandante PNTL eskuadra Becora, Inspetór Assitente Paulino de Carvalho ho membru Konsellu Polisiamentu Komunitária (KPK).

Notísia relevante:PNTL oferese nesesidade bázika ba família 23 iha Darlau

Inspetór Assitente Paulino de Carvalho, rekoñese katak, liu hosi indentifikasaun iha terrenu nota abitante rua ne’e moris nu’udár faluk ho oan-sira durante implementasaun Estadu Emerjénsia, Serka Sanitária no Konfinamentu Domisiliáriu labele sai hosi uma hodi buka moris no susar atu hetan osan hodi sustenta uma laran.

Tuir dadus ne’ebé ekipa Ofisiál Polísia Suku (OPS) Becora rekolla, abitante-sira durante ne’e konsumu de’it ai-han hanesan, talas, ai-farina no kumbili fuik.

“Apoia ne’ebé ita fó maski kiik, importante bele ajuda sira atu konsumu,” Paulino de Carvalho  hateten ba jornalista Agência Tatoli via telefónika, sesta ne’e.

Tuir observasaun PNTL katak, família rua ne’e  mós hanesan vítima ba inundasaun iha 04 abríl, tanba uam hetan estragu hosi inundasaun no to’o oras-ne’e seidauk hetan apoiu ruma.

Alende ne’e, PNTL mós haree katak, inan-feton na’in-rua durante ne’e moris ho fa’an ai-maran, maibé ai ne’ebé sira rekolla ema la sosa tanba serka sanitária.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here