Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE da-XIV hosi Prezidente Repúblika, iha sala plenária PN, sexta (28/05). Imajen TATOLI/Egas Cristóvão

DILI, 28 maiu 2021 (TATOLI)—Primeiru-Ministru (PM), Taur Matan Ruak, konvida entidade hotu atu hola parte iha diseminasaun informasaun kona-ba importánsia vasina kontra COVID-19.

“Ha’u konvida lideransa nasionál, partidu polítiku, empreza no forsa sira ne’ebé halo parte iha ita-nia sosiedade sivíl atu kontribui ba esforsu diseminasaun no sosializasaun informasaun kona-ba benefísiu vasina, ne’ebé boot liu fali potensiál risku hirak ne’ebé iha, bainhira ita simu vasina,” Xefe Governu hateten iha ámbitu diskusaun ba renovasaun Estadu Emerjénsia ba da-XIV iha Parlamentu Nasionál (PN), sesta ne’e.

Timor-Leste hetan asesu vasina ho tipu COVID-19, ho ajuda hosi sistema COVAX Facility hosi Organizasaun Nasaun Unida (ONU) no país amigu sira.

“Ida-ne’e hatudu jenerozidade no solidaridade internasionál ne’ebé Governu agradese, liu-liu tanba sai nafatin hanesan dalan ne’ebé efikásia no sustentável hodi hakat liu no manán moras mortál ne’e,” nia akeresenta.

Tuir Xefe Ezekutivu, vasinasaun jerál ba populasaun sai hanesan estratejia ne’ebé di’ak liu atu asegura protesaun ba povu nia saúde no moris, inklui dalan ne’ebé lalais liu atu filafali ba normalidade, rekupera ekonomia no harii país ho ánimu foun, determinasaun no empeñu.

“Tanba-ne’e, ha’u husu kompriensaun Deputadu sira, katak importante atu ita hamutuk no serbisu iha ekipa, atu nune’e bele mobiliza ita-nia povu halakon COVID-19 iha ita-nia país, hodi autoriza efeitu ne’e ba renovasaun Estadu Emerjénsia ba da-XIV,” PM subliña.

Entretantu, tuir dadus hosi Sala Situasaun-Sentru Integradu Jestaun Krize (CIGC, sigla portugés), to’o sesta ne’e, ema hamutuk 76.683 iha territóriu tomak mak simu ona vasina AstraZeneca.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here