Xefe Bankada Frente-Mudança (FM), Deputada Isabel Maria Barreto Freitas Ximenes. Imajen TATOLI/Evaristo Soares Martins.

DILI, 28 maiu 2021 (TATOLI)—Bankada Frente-Mudança iha uma fukun Parlamentu Nasionál, husu VIII Governu Konstitusionál halo avaliasaun ba deklarasaun estadu emerjénsia no aplikasaun regra serka sanitária no konfinamentu obrigatóriu ne’e la efetivu.

“Governu presiza halo avaliasaun ba iha implementasaun estadu emerjénsia ne’ebé la’o ona ba dala-XIII ne’e (agora ba dala-XIV) la efetivu, tanba kazu infesaun COVID-19 iha nível komunidade kontinua aumenta,” Xefe Bankada Frente-Mudança (FM), Deputada Isabel Maria Barreto Freitas Ximenes, levanta liuhosi diskusaun estensaun estadu emerjénsia ba dala-XIV, iha uma fukun, sesta ne’e.

Nia observa katak implementasaun medida serka sanitária iha problema sósiu-ekonómiku ne’ebé Governu hatuur hatudu katak restaurante no prestasaun serbisu bele loke maibé só bele halo serbisu lori entrega iha uma, maibé realidade iha implementasaun ne’e hamosu diskriminasaun tanba balun kumpre regra no balun lae. 

“Ami husu ba Governu atu bele kria mekanizmu ida di’ak hodi bele kontrola didi’ak situasaun ida-ne’e,” nia husu.

Aleinde ne’e, Bankada Frente-Mudança iha preokupasaun boot kona-ba vida ekonomia povu nian tanba iha períodu agora daudaun ne’e, zona produtór kafé sira tama ona iha kolleta kafe hanesan iha Ermera maibé ho serka sanitaria ne’e limita tiha povu nia sirkulasaun. 

“Limitasaun ba sirkulasaun populasaun nian difikulta ita-nia populasaun sira iha zona produtór kafé nian, sira labele kolleta kafé ho di’ak. Ne’e problema boot ida-ne’ebé mosu hela. Períodu kolleta kafé hanesan agora ne’e nu’udar períodu importante ba zona produtór kafé sira tanba maioria populasaun sira-nia rendimentu dependente ba sira-nia kafé,” nia dehan.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here