Patromóniu Estadu. Imajen Tatoli/Egas Cristovão

DILI, 28 maiu 2021 (TATOLI)—Komisaun Anti Korrupsaun (CAC sígla portugés), simu ona lista kargu xefia balun hosi ministériu no instituisaun Estadu balun, kona-bá prosesu arollamentu deklarasaun riku-soin no bens interese.

“Notifikasaun ne’ebé ita hasai ona, Serbisu Rejistu Verifikasaun Emprezariál (SERVE) mak haruka ona deklarante hamutuk ema na’in 23. Alende ne’e, parte Eletrisidade Timor Leste, Empreza Públika (EDTL,EP) mós haruka ona maibé iha buat balun la kompletu, nune’e ita haruka fila-fali atu hadi’a,’’ Adjuntu Komisáriu CAC ba Asuntu Prevensaun no Sensivilizasaun, Luis Oliveira Sampaio, hateten ba jornalista Agéncia Tatoli iha Dili, sesta ne’e.

Notísia relevante:Deklara riku-soin, CAC husu partisipasaun ministériu hotu-hotu

Hosi arollamentu ne’e, kargu xefia-sira kompostu hosi Diretór Jerál, Diretór diresaun  nasionál, xefe departamentu no funsionáriu iha área rekolla reseita ka impostu, ida-idak presiza prienxe  formuláriu ba identifikasaun pesoál hosi ministériu ne’ebé asume knaar saida, tinan inísiu serbisu, nível estudu ho membru agregadu familiár.

“Objetivu hosi arrolamentu ne’e atu hatene forsa traballu to’o iha ne’ebé no forsa hosi CAC hodi bele hahú serbisu,’’ nia hateten.

CAC mós apresia ho ministériu-sira, tanba maioria kopera no iha interese atu rejista sira-nia deklarasaun refere.

Iha 14 maiu, CAC hasai notifikasaun ba nível ministériu, Sekretária Estadu to’o autoridade munisipál hamutuk 66, ba prosesu arrolamentu ne’ebé sei termina iha fulan juñu.

Prosesu arrolamentu dadus pesoál ne’ebé instituisaun ida-idak sei aprezenta relatóriu informasaun, hafoin ne’e CAC hahú efetua serbisu ba instituisaun hira mak arroladu, hodi sujeita halo deklarasaun.

Tanba ne’e, CAC sei halo arrolamentu ba dadus pesoál hosi instituisaun hotu, nune’e bele define mapamentu instituisaun hira mak aplika uluk, hodi deklara riku-soin.

Semana oin arrolamentu ba instituisaun autónomu

Tuir planu, CAC sei haruka notifikasaun ba instituisaun Estadu autónomu-sira, hodi halo arrolamentu ba kargu xefia, ba prosesu deklarasaun riku-soin no bens interese, iha semana oin.

“Semana oin sei haruka tan notifikasaun ba instituisaun autonoma sira 20-resin ne’ebé antes ne’e seida’uk konsege notifika,’’ Luis Oliveira Sampaio, subliña.

Nia apela ba instituisaun autónomu-sira atu kontribui iha prosesu ne’e, hodi fó susesu ba serbisu.

Lei númeru 7/2020, 26 agostu kona-bá Medida Prevensaun no Kombate Korrupsaun (MPKK), tama ona vigór iha 22 fevereiru 2021.

Lei MPKK prevee iha kapítulu II Regime de Declaracão de Rendimentos, Bens e Interesses hosi artigu 27 to’o artigu 58.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here