Presidente CI, Virgílio da Silva Guterres. Imajen TATOLI/Antonio Goncalves.

DILI, 28 maiu 2021 (TATOLI)—Konsellu Imprensa (CI, sigla portugés) rekomenda ba Governu liuliu Ministériu Asuntu Parlamentár no Komunikasaun Sosiál (MAPKOMS) haree formatu rekrutamentu ne’ebé garante independensia mídia estatál, Agência TATOLI,I.P no RTTL-EP atu garante independénsia, duke nomeasaun polítika.

Notísia Relevante: Mídia la promove mensajén espirituál hosi relijiaun sira iha TL

“Ami tau-matan uluk mak RTTL ho TATOLI. Tanba estrutura no ema-ne’ebé lidera institusaun públiku rua-ne’e nomeasaun polítika, entaun institusaun públiku ne’e labele la’o ba oin. CI la garante Prezidente RTTL, José António Belo, to’o mandatu termina, tanba tinan oin eleisaun prezidensiál ona,” Prezidente CI, Virgilio da Silva Guterres ba jornalista sira bainhira relata rezultadu monitorizasaun CI nian iha Kintal Boot, sesta ne’e.

Virgílio da Silva Guterres hatutan, kanál mídia estatál rua ne’e hanesan instituisaun sosiál la’ós instituisaun polítika, entaun CI iha kompeténsia atu halo supervizaun ba funsionamentu órgaun informativu públiku rua ne’e.

Bainhira partidu PLP, KHUNTO, no Fretilin mak nafatin kaer ukun, nia dehan, Prezidente RTTL mós sei mantein nia pozisaun, maibé partidu seluk mak sa’e fali, entaun fó baze ba partidu seluk hodi nomea ema foun.

Tanba ida-ne’e, nia fó hanoin ba Governu atu lideransa ida-ne’ebé mak atu lidera RTTL.EP no Agência TATOLI,I.P tenke hetan protesaun, nune’e laiha Governu ida mak mai hasai ema sira-ne’e ho razaun polítika.

Prezidente Conselho de Imprensa hateten, dalan ne’ebé mak atu solusiona kestaun ne’e mak Governu no instituisaun ne’ebé iha kuadru legál hodi regula, tanba RTTL.EP no Agência TATOLI.I.P ne’e instituisaun independente, entaun ninia prosesu no nomeasaun, jestaun no lideransa sira mós tenke garante transparánsia.

Tuir nian, instituisaun mídia estatál nia futuru ne’e depende ba Governu ida-nian, maibé bainhira Governu la estavel mak RTTL.EP no TATOLI,I.P mós la estavel.

“Ida-ne’e ami-nia opiniaun, maibé buat ne’e akontese ona hahú 2017 to’o agora,” Virgílio da Silva Guterres hateten.

Jornalista       : Osória Marques

Editór             : Cancio Ximenes

HAKEREK NO HATÁN

Please enter your comment!
Please enter your name here