Deputada Bankada CNRT. Virgínia Ana Belo. Imajen/Cipriano Colo.

DILI, 28 maiu 2021 (TATOLI)—Bankada Congresso Nacional de Reconstrução de Timorense (CNRT) husu Parlamentu Nasionál (PN) atu halo fiskalizasaun ba efeitu sira hosi aplikasaun deklarasaun estadu emerjénsia ne’ebé to’o ona dala-XIV.

Bankada CNRT konsidera medida sira-ne’ebé Governu implementa la kondis ho realidade iha terrenu, mosu aglomerasaun iha fatin-fatin ne’ebé Governu rasik mak organiza; programa cesta bázika, rejistrasaun subsídiu iha Ministériu Sosidaredade Sosial.

Nune’e mós halo lansamentu vasína no hetok piór organizasaun ne’ebé toma konta ba COVID-19-Sentru Integradu Jestaun Krize (SIJK) halibur ema barak sein kumpre rekezitu protokulu saúde nian.

“Ho realidade sira ne’e, Bankada CNRT konsidera katak tempu ona ba Parlamentu Nasionál atu tetu didi’ak antes estende Estadu Emerjénsia ba dala XIV. Parlamentu presiza avalia efeitu sira hosi estadu emerjénsia nian ba mitigasaun COVID-19 no mós ba povu nia moris loro-loron nian,” Reprezentante Bankada CNRT, Deputada Virgínia Ana Belo, levanta liuhosi plenária estraordinária iha estensaun estadu emerjénsia ba dala-XIV, sesta ne’e.

Nia hateten, Governu relata númeru pozitivu surtu COVID-19 ativu sa’e maka’as loro-loron, públiku la hatene nível avaliasaun ba planu no estratéjia adekuadu ba prevensaun no kombate surtu COVID-19.

Bankada CNRT haree katak implementasaun Estadu Emerjénsia nian la efetivu ona atu prevene surtu COVID-19 tanba loron ba loron númeru afetadu pozitivu kontinua aumenta ba beibeik, áte to’o iha prizaun mós bele hetan kontaminasaun hosi virus ida-ne’e.

Husu ba Governu atu konsidera opsaun ne’ebé aprezenta hosi CIGC tanba aplikasaun Estadu Emerjénsia lori terus barak liu ona ba povu kompara ho COVID-19. Povu nia movimentu limitadu no defísil atu sustenta sira-nia moris loron-loron, enkuantu OJE 2021 ho montante biliaun $2.1 disponivel hela iha Governu nia konta maibé labele halo intervensaun ba povu nia moris.

“Povu barak kontinua husu ai-han ba padre no madre sira-nia fatin,” nia dehan.

CNRT konkorda ho Conselho Combatante Libertação Nacional ne’ebé ezije ba Governu atu fó sai númeru Óbitu hosi moras seluk, tanba Bankada CNRT haree katak Governu sofre paranóia ba COVID-19 hodi ignora tiha moras sira seluk.

Bankada CNRT durante ne’e akompaña povu nia moris iha períodu Estadu Emerjénsia no estensaun beibeik ba Estadu Emerjénsia lori presaun psikolójika ba sidadaun sira, inklui estudante sira-ne’ebé baruk tiha ona ho situasaun ne’ebé obriga sira tuir online class ho koneksaun internet ne’ebé la estável no karun.

“Presaun psikolójika ida-ne’e la-ós de’it afeta ba povu bainbain nia moris, maibé membru instituisaun seguransa nian mós afetadu hosi presaun ida-ne’e. Ikus mai ita komesa haree atuasaun opresiva no halo violasaun hasoru povu iha fatin-fatin,” refere deklarasaun polítika hosi Bankada CNRT.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here