Aviaun Citilink to’o iha Aeroportu Comoro, kinta (27/05). Imajen TATOLI/António Gonçalves

DILI, 27 maiu 2021 (TATOLI)—Voo Aviaun Citilink H320, ho destinasaun Dili bá Jakarta, Indonézia, no sei kontinua bá Xina, sai hosi Aeroportu Internasionál Prezidente Nicolau Lobato, Comoro, iha tuku 15:45, ne’ebé tula pasajeiru 140.

Diretór Citilink, Fernado da Silva, hateten, pasajeiru hirak ne’e maioria xineza ne’ebé serbisu iha Timor-Leste.

“Sira ne’e hanesan traballadór hosi kompañia China Harbour, ne’ebé envolve iha projetu Portu Tibar no balun traballadór iha sentrál elétrika Hera, funsionáriu iha Embaixada Xina iha Timor-Leste no traballadór xineza ne’ebé serbisu iha konstrusaun infraestrutura, ne’ebé hakarak fili bá Xina,” Diretór ne’e informa iha Aeroportu Comoro, kinta ne’e.

Antes ne’e, iha loron hanesan aviaun ne’e hosi Jakarta-Dili to’o iha aeroportu tuku 14:50 no tula pasajeiru balun no mate-isin ida.  

“Pasajeiru ne’ebé mai maioria timor-oan de’it, tanba aviaun ne’e mai hosi Indonézia mamuk, entaun tula ita-nia maluk timor-oan ne’ebé durante ne’e halo tratamentu iha Indonézia tanba moras hamutuk na’in-13 iha Ospitál Siloam, inklui família na’in-rua hosi eis Deputada Merita Alves hodi partisipa funebre, no mate-isin eis Deputadu Duarte de Deus Barreto, inklui nia família ida,” nia akresenta.

Aleinde ida, Aviaun Citilink ho destinasaun voo hosi Xina mai Dili sei lori pasajeiru hamutuk na’in-90, iha sesta (28/05).

“Sira ne’e mós hanesan traballadór hosi kompañia China Harbour, ne’ebé mai troka ida ohin arranka bá Xina tanba kontratu ramata ona no balun traballadór xineza ne’ebé serbisu iha Timór,” nia hatutan.

Voo ho Aviaun Citilink hanesan charter hosi Embaixada Xina iha Timor-Leste, ne’ebé serbisu hamutuk ho Ministériu Transporte no Komunikasaun no Sala Situasaun-Sentru Integradu Jestaun Krize (SS-CIGC, sigla portugés).

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here