Membru PNTL hala’o patullamentu tama-sai bairru iha Dili, hodi asegura komunidade iha situasaun serka sanitária, kuarta (12/05/21). Imajen Tatoli/António Gonçalves.

DILI, 27 maiu 2021 (TATOLI)—Tuda-malu entre grupu joven ne’ebé akontese iha aldeia Beto-tasi, suku Madohi, postu administrativu Dom Aleixo, munisípiu Dili, rezulta joven mane ida kanek iha parte ulun no uma komunidade balun hetan estragu.

Segundu Komandante Polísia Nasionál Timor Leste (PNTL) munisípiu Dili, Superintendente Euclides Belo, informa, kazu tuda-malu ne’e akontese iha kuarta 26 maiu tuku 22:00 otl.

Notísia relevante:Konfrontu iha Surikmas, PNTL detein joven na’in-tolu

Hafoin akontesimentu, polísia munisípiu Dili no Unidade Espesiál Polisia (UEP) no Batalliaun Orden Públiku (BOP), atu kedan hodi hakalma situasaun no transporta kedan vítima ba hala’o tratamentu saúde iha klínika Comoro.

“Kazu tuda-malu iha Beto ne’e, ita-nia ekipa Dom Aleixo halo hela investigasaun, depois sei relata kronolojia,” Superintendente Polísia, Euclides Belo hateten ba jornalista-sira, iha Komandu Polísia, Caicoli, kinta ne’e.

Ofisiál Polísia Suku (OPS) no Membru Konsellu Polisiamentu Komunitária (KPK), rekolla ona dadus no koordena kedan ho autoridade suku, hodi buka solusaun ba problema ne’e, nune’e evita konflitu labele mosu bebeik.

Euclides Belo apela ba grupu joven iha área ne’e atu kria unidade, hodi ajuda polísia asegura komunidade durante Estadu emerjénsia.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here