Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

DILI, 27 maiu 2021 (TATOLI)Eletricidade de Timor-Leste, Empreza Públika (EDTL, E.P) planeia iha tinan ne’e atu dada ahi ba suku ne’ebé seidauk asesu enerjia eletrisidade.

Tuir Prezidente Konsellu Administrasaun EDTL, E.P, Paulo da Silva, tasa seidauk asesu ba eletrifikasaun barak liu iha munisípiu Ermera, tuir mai mak Manufahi, Viqueque, Bobonaro no Covalima.

“Tanba ne’e, ho kapasidade finanseira no rekursu ne’ebé iha, sei fó persentajen barak liu ba fatin ne’ebé seidauk asesu, nune’e tinan ne’e suku hotu sei asesu hotu hodi kontinua tama ba aldeia sira,” Prezidente Konsellu Administrasaun EDTL E.P, informa iha ámbitu lansamentu projetu eletrifikasaun iha suku Rairobo, munisípiu Bobonaro, kinta ne’e.

Notísia relevante: Hahú ohin, EDTL,E.P lansa konkursu instala eletrisidade pakote 30

Suku iha munisípiu Ermera ne’ebé seidauk asesu eletrisidade maka Goulolo, Humboe, Era-ulu, Parami, Laklo, no Obulu, iha munisípiu Manufahi maka Dotik, Rotutu Tutuluru, Grotu, Mindelu, Liurai.

Munisípiu haat ne’ebé mak iha de’it suku ida mak seidauk asesu, sei sai prioridade halo instalasaun ahi hanesan iha munisípiu Ainaro iha suku Soru-kraik, munisípiu Aileu iha suku Tohu metan no Manatuto, suku Fatumakerek, munisípiu Liquiçá suku Fatukesi, no munisípiu Bobonaro iha suku tolu suku Saburai,  Atabae no Guda.

Iha munisípiu Baucau, iha suku hitu mak seidauk asesu eletrisidade hanesan, suku Uaibobo, Nahareka, Boilo, Waguia, Osoria, Osoala no Maluru, munisípiu Covalima iha suku Usikai no Laktus.

Enkuantu, iha munisípiu Dili rasik iha postu administrativu Cristo Rei, suku Bidau Santana no iha Ataúru iha suku suku Makadadi, Vila Maumeta no Makili mak seidauk asesu liña eletrisidade.

Antes ne’e, iha tersa (25/05), EDTL, E.P lansa ona konkursu públiku faze dahuluk ba projetu instalasaun eletrisidade hamutuk pakote 30 iha suku 33, hosi totál suku 76 iha territóriu nasionál ne’ebé seidauk asesu.

Jornalista: Antónia Gusmão

Editora: Julia Chatarina    

HAKEREK NO HATÁN

Please enter your comment!
Please enter your name here