Sidadaun ne’ebé dansa iha kuarentena Tasi-tolu. Imajen facebook.

DILI, 27 maiu 2021 (TATOLI)—Polísia Nasionál Timor Leste (PNTL), liu hosi komandu munisípiu Dili, orienta ona ekipa hodi halo investigasaun ba sidadaun, ne’ebé baku-malu no dansa livre iha isolamentu Tasi-tolu, Dili.

Vídio ne’ebé hatudu sidadaun feto na’in-tolu no mane na’in-tolu dansa ho durasaun 00:08, inklui joven mane na’in-tolu baku-malu iha kontainer leten, daudaun-ne’e virál iha média sosiál.

Notísia relevante:PNTL sei investiga selebrasaun 20 maiu iha Masin-Lidun

Segundu Komandante PNTL Munisipiu Dili, Superintendente Euclides Belo, konsidera asaun baku-malu no dansa iha isolamentu nu’udár krime no kontra regra Serka Sanitária ho Konfinamentu Domisiliáriu, tanba isolamentu hanesan fatin atu halo rekoperasaun ba saúde.

“Ita halo ona investigasaun. Tanba ne’e, sei hein hela relatóriu ne’ebé komandu eskuadra Dom Aleixo halo,” Euclides Belo, hateten ba jornalista-sira iha Komandu PNTL, Caicoli, kinta ne’e.

Euclides Belo informa sidadaun ne’ebé dansa no baku-malu, bainhira pasa ona loron 14 hosi kuarentena, sei submete ba prosesu investigasaun.

“Sira sei submete ba prosesu investigasaun hodi responsabiliza aktu krime ne’ebé sira komete,” nia hateten.

Komandu munisípiu Dili, apela ba abitante-sira hotu ne’ebé hela iha isolamentu tenki dixiplina hodi kumpre regra saúde no koopera ho ekipa saúde atu bele fó asisténsia saúde, nune’e proteje an nafatin hodi ameasa peste letál COVID-19.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here