Primeiru-Ministru, Taur Matan Ruak, hamutuk ho membru Governu diskute pedidu renovasaun deklarasaun EE da-XIV hosi Prezidente Repúblika, iha sala plenária PN, sexta (28/05). Imajen TATOLI/Egas Cristóvão

DILI, 28 maiu 2021 (TATOLI)–Primeiru-Ministru (PM), Taur Matan Ruak, enkoraja sidadaun atu labele lakon esperansa kombate COVID-19, maski kada loron rejista kazu ativu aumenta ba bebeik.

“Infelizmente ita hotu tenke prepara-an ba senáriu aat liu, labele lakon konfiansa no esperansa, tanba presiza hakat liu no manán vírus mortál ne’e iha tempu besik nia laran,” PM enkoraja sidadaun tomak iha ámbitu diskusaun ba renovasaun Estadu Emerjénsia ba da-XIV iha sala plenária Parlamentu Nasionál (PN), sesta ne’e.

Nia dehan, Governu halo ona preparasaun karik iha posibilidade iha tempu badak bele hasoru kazu foun infezaun ba kada loron atinje 1.000, nune’e bele koloka Timor-Leste iha topu mundiál kona-ba kazu foun sira iha Brazíl, Papua Nova Guiné no Índia.

“Karik senáriu ne’e mosu duni, ita tenke frontál ho objetivu atu rekoñese katak ita-nia Servisu Saúde Nasionál la preparadu atu hatán iha tempu útil ba kazu hotu, liu-liu kona-ba atendimentu ba situasaun emerjénsia ka iha akompañamentu no tratamentu ba kazu COVID-19 grave liu, ne’ebé tenke baixa iha unidade kuidadu intensivu nian,” nia akresenta.

Tuir Xefe Ezekutivu, karik Servisu Saúde Nasionál iha tempu badak bele hasoru situasaun ho presaun boot tanba númeru kazu ne’ebé presiza asisténsia médiku ospitalár sa’e maka’as, no situasaun ne’e bele agrava mós risku moris ba sira ne’ebé iha nanis ona kondisaun ne’ebé bele halo COVID-19 dezenvolve-an ho forma a’at liu.

Nune’e, situasaun ne’e sei sai dezafiu boot ba demokrasia no instituisaun Estadu sira, nune’e mós ba kapasidade prevensaun no reasaun iha faze resposta ne’ebé hahú ona.

“Ita labele husik lakon áhi esperansa no fó konfiansa ba ezekusaun planu nasionál vasinasaun nian, ne’ebé la’o daudaun ho ritmu di’ak no  permite ona prosesu ba ita-nia maluk sidadaun na’in-65.000,” nia hatutan.

Tanba ne’e, haree ba evolusaun situasaun epidemiolójika ne’ebé hamosu preokupasaun maka’as iha nível nasionál, maka membru Konselhu Superiór Defeza no Seguransa no Konsellu Estadu konkorda ho renovasaun ba deklarasaun Estadu Emerjénsia nian, iha momentu ne’ebé númeru akumuladu infesaun COVID-19 sa’e ba 6.000, sura hosi kazu rejistadu dahuluk iha marsu 2020 no hosi númeru ne’e iha kazu kuaze 3.000 resin klasifikadu nafatin hanesan kazu pozitivu no ativu iha sentru izolamentu oin-oin.

Antes ne’e, Governu propoin ona ba Xefe Estadu atu renova deklarasaun Estadu Emerjénsia, tanba haree ba faktu katak to’o loron ne’e rejista ema na’in-15 maka mate tanba moras ne’e no tanba matenek-na’in no espesialista saúde sira iha nasionál no internasionál, ne’ebé  Governu konsulta, konkorda ho hanoin katak situasaun epidemiolójika sei sai a’at liután ba beibeik ho númeru kazu infesaun foun ne’ebé aumenta.

Maski totál ema infetadu liu ona 1% hosi populasaun no rejista númeru propagasaun aumenta lalais, liuliu iha sidade kapitál iha semana hirak ikus no nakfilak ba episentru kazu foun sira, maibé ema balun defende katak medida ne’ebé Estadu adota atu kontrola pandemia bele hamamar, hodi sujere atu filafali ba situasaun normalidade, ne’ebé justifika ho razaun ekonómika no sosiál.

“Governu kompriende apelu sira tanba difikuldade hosi restrisaun, liga ho períodu Estadu Emerjénsia tutuir malu, ne’ebé sai grave liután iha abríl 2021 tanba dezastre naturál. Tanba ne’e Governu labele konkorda ho eskolla sira ne’ebé la konsidera konsekuénsia hirak ne’ebé sei mosu ba povu nia saúde no moris, tanba defeza no protesaun hanesan devér Estadu,” PM defende.

Tuir Xefe Ezekutivu, parseiru dezenvolvimentu oin-oin inklui organizasaun internasionál sira, liu-liu hanesan Organizasaun Mundiál Saúde (OMS) no UNICEF, la konkorda ho apelu sira atu hamamar medida prevensaun no kontrolu pandemia iha territóriu nasionál no sira defende nafatin manutensaun ba medida prevensaun, mitigasaun no kombate pandemia ne’ebé Governu implementa iha fulan ikus ne’e.

Organizasaun internasionál sira defende mós manutensaun ba impozisaun serka sanitária no konfinamentu jerál populasaun, ne’ebé bainhira hahú adota sempre hetan apoiu tékniku no halo tuir progresivu agravamentu situasaun epidemiolójika.

“Ohin la hanesan uluk, tanba ne’e hanesan komunidade nasionál, ita tenke halo tuir no promove nafatin ábitu no komportamentu di’ak sira ba prevensaun risku infesaun hanesan uza máskara, fase liman beibeik ho sabaun, distansiamentu sosiál, konfinamentu ka hela iha uma, evita halo dezlokasaun ne’ebé la importante no labele halibur malu hamutuk,” PM apela.

Tuir Xefe Governu, kada semana Governu iha sorumutuk Konsellu Ministru, ko’alia kona-ba nesesidade maibé susar tebes atu tau iha ekilíbriu medida oin-oin ne’ebé uza kombate hasoru pandemia no regula intensidade medida sira tuir situasaun konkreta ne’ebé verifika iha sirkunskrisaun administrativa ida-idak.

Enkuantu, iha tempu hanesan, Governu mós buka atu mantein ativu kanál distribuisaun ai-han no produtu esensiál seluk hodi permite tuir saida maka bele halo, ezersísiu atividade ekonómika hirak ne’ebé esensiál ba família sira-nia moris, sustentabilidade empreza no organizasaun sosiedade sivíl sira no atividade sirane’ebé mak konsidera importante ba esforsu rekonstrusaun país.

“Governu kontinua determinadu atu salva moris, hodi fó ninia empeñu, dedikasaun no enerjia tomak atu kombate pandemia ne’e no kria kondisaun ba sira ne’ebé konsidera importante atu atende kazu infesaun foun sira ne’ebé tuir projesaun no tendénsia atuál sira sei hatudu agravamentu situasaun preokupante iha semana hirak oin mai,” PM subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here