iklan

NASIONÁL, COVID-19, DILI, HEADLINE, KAPITÁL, SEGURANSA

Pasa revista transporte públiku kontribui ba Dili hakmatek

Pasa revista transporte públiku kontribui ba Dili hakmatek

Komandu PNTL munisípiu Dili, halo apreensaun ba motorizada 174, no para hela iha aredór edifísiu PNTL Dili. Imajen Tatoli/Eugénio Pereira.

DILI, 27 maiu 2021 (TATOLI)—Segundu komandante Polísia Nasionál Timor Leste (PNTL), munisipiu Dili, Superintendente Euclides Belo, konsidera operasaun hodi halo pasa revista ba movimentu transporte públiku iha Dili, kontribui ba programa Dili hakmatek.

Operasaun ne’e rasik envolve Komandu Jerál PNTL, liu hosi Diresaun Nasionál Tránzitu no Seguransa Rodoviária (DNTSR), no parte Unidade Espesiál Polísia (EUP), ho Batalliaun Orden Públiku (BOP).

Notísia relevante:Tersa-kuarta, DNTSR halo apreensaun ba motorizada 150-resin

“Operasaun ne’e kontrbui ba programa Dili hakmatek, durante implementasaun Estadu Emerjénsia, Serka Sanitária no Konfinamentu Domisiliáriu,” Euclides Belo hateten ba jornalista-sira iha Komandu PNTL, Caicoli, kinta ne’e.

Durante halo operasaun iha 25 to’o 26 maiu, polísia halo mós apreensaun ba motorizada hamutuk 174 ne’ebé laiha dokumentu.

“Ita halo mós apreensaun ba motór hamutuk 174, no infratór-sira maioria lori motór laiha dokumentu, balun sobu motór nia asesoris no balun fali laiha karta kondusaun,” nia esplika.

PNTL sei kontinua hala’o operasaun iha tempu kalan no loron hodi asegura rezolusaun Governu ba implementasaun Estadu Emerjénsia, Serka Sanitária no Konfinamentu Domisiliáriu.

Oras-ne’e daudaun, motorizada hamutuk 174 para hela iha aredór edifísiu Komandu PNTL Dili, no infratór-sira balun ba foti ona resibu infrasaun, hodi ba selu multa iha banku.

Jornalista: Eugénio Pereira

Editór: Cipriano Colo

iklan
iklan

Leave a Reply

iklan
error: Content is protected !!