Komandante Jerál PNTL, Komísariu Faustino da Costa. Imajen /Antonio Goncalves

DILI, 27 maiu 2021 (TATOLI)—Komandu Jerál Polísia Nasionál Timor-Leste (PNTL), Komisáriu Fautino da Costa, hateten orientasaun Komandu PNTL klaru iha atividade operasaionál atu garante lei no orden.

“Ha’u hanoin orientasaun klaru, no orientasaun hosi komando ne’e sempre eskrita, la’ós verbal. Ita kompriende katak interpretasaun eskrita ne’e mós la to’o ba membru ida–idak maibé nia-komandante seksaun ne’ebé mak lidera ne’e, sira sempre iha orientasaun verbál ba iha kraik,” Faustino da Costa hateten ba jornalista sira hafoin hala’o enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairru Pite, Dili, kinta ne’e.

Komisáriu Faustino da Costa hatutan, Komandu PNTL sei kontinua tau atensaun ba atuasaun membru PNTL sira iha terenu no sei la tuur nonook de’it, bainhira identifika membru PNTL balun viola regra dixiplinar iha sira-nia asaun.

PNTL iha ekipa konjunta ne’ebé kompostu husi “Inspesaun no Departamentu Justisa” hodi atende hirak ne’ebé sente sai vítima hosi asaun membru PNTL nian no halo investigasaun ba membru sira-ne’ebé deskonfia komete violasaun hasoru regra dixiplinar instituisaun nian.

 “Ita-nia prosesu ne’e iha rua, prosesu interna no prosesu externa. Hosi prosesu rua-ne’e, ida independente maibe ida fali haree mós ba nia grau infrasaun sira-ne’e sei hein parte sira seluk. Ida-ne’e buat ne’ebé ita sei haree ba oin. Haree katak akontesementu ida-ne’e (ajente polísia baku vendedór), komandu PNTL enkontru ona ho Vise-Ministru Interiór, ami bele konvida ba prosesu indisiplinar,” Komisáriu ne’e hateten.

Nia informa, situasaun atuál iha rai-laran no nível nasionál la’o di’ak tebes, maske iha akontesementu balun hanesan asaltu malu, tuda malu no baku malu maibé prosesu ne’ebé iha sei atende.

“Dalai da tán, situasaun nível territóriu nasionál la’o di’ak. Iha terrenu notak sei nafatin iha grupu arte marsiál hanesan akontesementu iha munisípiu balun. Agora daudaun polísia atende no atua hela,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here