Loja materiál konstrusaun. Imajen/Espesiál

DILI, 27 maiu 2021 (TATOLI)—Na’in ba loja konstrusaun Lin Qiang, Hua Sheeng, rekoñese daudaun ne’e presu materiál konstrusaun iha Dili sa’e maka’as tanba kustu transportasaun.

“Sasán sira hanesan besi beton no sasán seluk hanesan kalen, daudaun nia presu sa’e tanba presu sasán iha Indonézia mós sa’e inklui kustu ró ne’ebé lori mai,” Hua Sheeng informa ba Agência TATOLI, iha loja materiál konstrusaun, Lin Qiang, Colmera, kinta ne’e.

Nia esplika, hanesan kalen mihis ne’e uluk ho presu $0,50, maibé agora presu sa’e ba $1 to’o $2, enkuantu kalen mutin ho marka 020, uluk ho presu $1,75, maibé agora sa’e ba $2,50.

Iha fain hanesan, traballadór iha Loja Colmera II Anima, Flávia Vital, hateten, durante seidauk implementa serka sanitária, loja fa’an materiál konstrusaun ho presu normál.

“Presu besi 4×4 uluk fa’an ho presu $11,50, maibé agora ami fa’an $14, enkuantu kalen ne’e uluk ami fa’an $2,50, agora sa’e ba $2,75,” nia akresenta.

Iha parte seluk, tuir traballadór ne’e, rendimentu loja iha períodu serka sanitária menus, ne’ebé uluk rendimentu fulan ida bele to’o $1.000, maibé agora la to’o montante ne’e, dalaruma $500 to’o $700.

Iha sorin seluk, Inspetór Jerál Autoridade Inspesaun no Fiskalizasun Atividade Ekonómia, Sanitária no Alimentár, Institutu Públiku (AIFAESA), Ernesto Monteiro, hateten nia parte seidauk simu relatóriu kona-ba folin nesesidade bázika  no materiál konstrusaun iha Dili sa’e, maibé sei komunika ba ministériu tutela.

“Ha’u sei relata situsaun ne’e ba Ministru Koordenadór Asuntu Ekonómika (MKAE) no ha’u rasik maka sei tuun dereta bá iha loja fa’an nesesidade bázika no konstrusaun, maibé  daudaun ne’e serka sanitária iha Dili laran, ha’u seidauk simu relatóriu ida hosi ekipa atu foti medida,” nia informa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here