Família hamutuk 15 ne’ebé hela provizóriu iha sentru akollamentu antiga Ospitál Lahane, simu sasán nesesidade bázika hodi re-integra hikas ba sira-nia uma. Imajen/Média SEPS.

DILI, 27 maiu 2021 (TATOLI)—Família hamutuk 15 ne’ebé hela provizóriu iha sentru akollamentu antiga Ospitál Lahane, re-integra hikas ba sira-nia uma.

Diretór Nasionál Jestaun Risku Dezastre, Sekretáriu Estadu Protesaun Sivíl (SEPS), Agostinho Cosme Belo hateten, família hirak-ne’e bele fila-fali ba ida-idak nia-uma, tanba kondisaun uma hahú maran ka di’ak ona hafoin sofre inundasaun iha 04 abríl.

Notísia relevante:SEPS kontinua verifika dadus ba apoiu materiál konstrusaun

Iha inísiu, família hamutuk 23 ho abitante 145 mak evakua iha sentru akollamentu antiga Ospitál militár Lahane, iha família 15 mak deside fila-fali ba ida-idak nia-uma, família ualu sei kontinua hela iha sentru ne’e tanba kondisaun uma hetan estragu totál.

“Governu fasilita sidadaun iha sentru akollamentu hotu-hotu, hodi fó atendimentu hanesan iha situasaun dezastre naturál. Tanba ne’e, desizaun re-integra ne’e inisiativa mai hosi família  ida-idak,‘’ Agostinho Cosme Belo, hateten iha Lahane, kinta ne’e.

Nia hatutan, Governu kontinua hamutuk ho parseiru tau matan nafatin hodi fó asisténsia desde inísiu dezastre akontese.

Iha prosesu re-integrasaun família hirak-ne’e, SEPS mós oferese apoiu umanitáriu hanesan ai-hán no la’ós ai-hán kompostu hosi foos, mina bimoli, sasán kuziña ho sira seluk, ne’ebé fornese hosi Embaixa Nova Zelándia iha Dili, liu hosi parseiru Oxfan ho Ra’es Hadomi Timoroan (RHTO).

Agostinho Cosme Belo mós agradese ba ekipa SEPS no Oxfan ne’ebé durante fó akompañamentu no asisténsia ba família-sira iha fatin ne’e.

Xefe Aldeia Coreio, Lahane Osidentál, Flavia Perreira dos Santos, agradese ba  Governu ho Oxfan ne’ebé desde dezastre akontese, fó tulun ba povu no la husik povu moris mesak iha situasaun kalamidade.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here