Kondisaun atmósfera atuál iha territóriu Timór. Imajen/DNMG

DILI, 27 maiu 2021 (TATOLI)–Ministériu Transporte no Komunikasaun (MTK) liuhosi Diresaun Nasionál Metrolojia no Jeofízika (DNMG, sigla Portugés) alerta ba populasaun iha área kosta súl atu atensaun no kuidadu tanba posibilidade sei iha anin no laloron boot iha ne’ebá.

“Alerta, anin no laloron tasi boot iha kosta súl, parte Manufahi, Manatuto, Lautém, Covalima, Viqueque. Atensaun mós tanba sei iha anin boot iha Dili no Baucau, inklui atensaun espesiál ba Ataúro no Rejiaun Administrativa Espesiál Oé-cusse no Ambeno (RAEOA) tanba anin boot,” refere nota ne’ebé Agência TATOLI asesu, kinta ne’e.

Ho kondisaun atmósfera atuál, iha posibilidade ohin (27/05) bele fó risku no prejudika movimentu transporte marítima no atividade iha tasi laran ba peskadór no seluk tan.

Nune’e, tuir observasaun hosi satelite meteorolójiku Himawari-8, nota katak daudaun kondisaun atmósfera maioria instável ka kalohan taka no posibilidade kauza udan fraku, prinsipalmente iha parte balun iha munisípiu Ainaro, Covalima, Lautém, Baucau (Venilale), Manatuto, Viqueque no Manufahi, enkuantu iha munisípiu seluk naroman ho kalohan balun.

Tanba anin huu ho nia velosidade fraku-moderadu kuaze  iha rejiaun foho-leten  no iha rejiaun kosteira liu-liu Lautém, Viqueque, Manatuto, Covalima, Baucau, RAEOA no Ataúru ho velosidade anin varia hosi moderadu forte.

Enkuantu, temperatura ar varia hosi sélsiu 17-29 iha rejiaun foho-leten no sélsiu 23-31 iha rejiaun kosteira.

Kondisaun laloran iha kosta norte a’as varia hosi metru 0,8-1,4 (normál-moderadu) no kosta súl laloran nia a’as varia hosi metru 1,8-3,0 (moderadu-forte).

Previzaun tempu lokraik hatudu kalohan sei dezenvolve-an taka no poténsia ba udan chuviska moderadu kuaze iha territóriu Timór hotu, prinsipalmente iha parte foho sira, exetu iha parte oeste no norte hosi Manatuto, Bobonaro, RAEOA no Ataúru mak naroman ho kalohan balun.

Anin kontinua huu ho velosidade fraku moderadu iha rejiaun montañoza no anin kontinua huu ho velosidade moderadu forte iha rejiaun kosteira hanesan Lautém, Viqueque, Manatuto, Covalima, Baucau, RAEOA no Ataúru, akompaña mós ho rajada anin ho nia intensidade forte, liu-liu iha Lautém no RAEOA.

Eventuál ida-ne’e akontese tanba hetan influensia hosi sistema meteorolójiku sira ne’ebé maka estabelesidu hanesan, enso neutro, madden julian oscillation (MJO), high pressure (HP) no mós iha efeitu hosi diferensa presaun ne’ebé maka atualmente observa iha territóriu Timór hodi impulsiona no intensifika briza marrítima.

Nune’e, DNMG informa laiha tendénsia ba udan extremu, maibé husu atu komunidade iha fatin ne’ebé alerta tenke nafatin kuidadu.

“Husu ba komunidade sira iha territóriu Timór laran hotu, liu-liu ba komunidade sira ne’ebé hela iha rejiaun mensionadu, prinsipalmente ba maluk peskadór sira atu toma atensaun ba eventuál ida-ne’e, hadook-an hosi fatin risku hanesan ai-hun boot, tasi ibun no seluk tan, atu nune’e bele evita hosi dezastre ne’ebé ita hotu la espera,” DNMG apela.

Nune’e mós DNMG husu mós ba maluk Unidade Polísia Marítima (UPM) sira ne’ebé halo patrulamentu iha kosta súl no movimentu transporte aéreu atu nafatin  tau atensaun ba eventuál ida-ne’e.

Aleinde ne’e, DNMG husu ba komunidade iha territóriu Timór laran hotu atu nafatin akompaña informasaun kona-ba kondisaun tempu no klima hosi fonte konfiável no kredível, liu-liu instituisaun ka autoridade ne’ebé serbisu iha ramu redusaun risku dezastre nian.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here