Enkontru entre Vise-Ministru Interiór (MI), António Armindo, ho First Secretary Home Affairs Austrália, Wanda Sendzimir, kinta (27/05/21). Imajen/média MI.

DILI, 27 maiu 2021 (TATOLI)–Governu Austrália liu hosi Embaixada iha Dili, sei fó apoiu hodi hadi’a sistema jestaun fronteira no kontrolu migratóriu, iha Timor-Leste (TL).

Vise-Ministru Interiór (MI), António Armindo, hamutuk ho First Secretary Home Affairs Austrália, Wanda Sendzimir, diskute ona kona-bá asuntu ne’e, liuliu mekanizmu haforsa serbisu migrasaun liu hosi sistema informasaun, hodi garante jestaun fronteira ne’ebé di’ak iha postu migrasaun ne’ebé instala ona iha territóriu nasionál.

Natísia relevante:Austrália oferese silindru oksijéniu 84 ba SAMES

“Ita diskute kona-bá oinsá hadi’a sistema atendimentu ne’ebé sei estabelese iha fulan oin, inklui projetu sistema informasaun jestaun fronteira, ne’ebé sei finansia hosi Governu Austrália,” Wanda Sendzimir, hateten liu hosi komunikadu ne’ebé Agéncia Tatoli asesu, kinta ne’e.

Komunikadu ne’e subliña, ho sistema jestaun ne’ebé modernu bele hadi’a sistema jestaun fronteira no kontrolu migratóriu sai di’ak liu-tán.

Esforsu atu hadi’a ne’e tanba konsidera serbisu migrasaun nu’udár autór prinsipál ne’ebé responsabiliza jestaun movimentu ema-nian.

Antes ne’e, IOM mós iha ona komitmentu atu apoia ekipamentu jestaun fronteira ka Migration Information and Data Analysis System (MIDAS), hodi halo monitorizasaun eletronikamente ba pasajeiru ne’ebé tama no sai liu hosi postu integradu migrasaun iha territóriu nasionál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here