Sekretária Estadu Igualdade no Inkluzaun (SEII), Maria José da Fonseca Monteiro de Jesus. Imajen Tatoli/Dok.

DILI, 26 maiu 2021—Sekretária Estadu ba Igualdade no Inkluzaun (SEII), tersa (25/05) ne’e hala’o sorumutu virtuál ho dretora ezekutiva Forum Komunikasaun Feto Timor Lorosa’e (FOKUPERS) no komandante polísia VPU-nasionál hodi rona direta informasaun hosi sira, oinsá atu bele serbisu hamutuk di’ak liután iha advokasia ba kazu violénsia bazea ba jéneru no kazu violénsia oioin ne’ebé pendente hela ka seidauk hetan solusaun.

“Ba kazu hirak ne’e, presiza iha koordenasaun ida-ne’ebé di’ak hosi parte hotu hodi buka dalan oinsá atu responde ba vítima violénsia oioin hasoru feto no labarik-feto inklui maluk portadora defisiénsia sira,” Sekretária Estadu ba Igualdade no Inkluzaun (SEII), Maria José da Fonseca Monteiro de Jesus, hateten liuhosi komunikadu imprensa ne’ebé Agência Tatoli asesu, kuarta ne’e.  

Entretantu, iha sorumutu virtuál ne’e, Diretora Ezekutiva Fokupers, Maria Fátima Guterres, aprezenta kona-ba difikuldade no dezafiu sira durante halo atendimentu ba vítima sira no oinsá serbisu kooperasaun rede referál sira iha atendimentu ba vítima sira iha situasaun serka sanitária no konfinamentu obrigatóriu ne’e.

Asuntu seluk ne’ebé Fokupers foti mak oinsá labarik vítima sira bele asesu ba Edukasaun, Saúde no halo atendimentu ba vítima violénsia bazeia ba jéneru no violensia oioin ne’ebé akontese iha tempu Estadu Emerjénsia no konfinamentu obrigatóriu ne’e.

Nia husu na Sekretária Estadu ba Igualdade no Inkluzaun (SEII) halo koordenasaun ho ministériu xave hirak-ne’ebé responsável ba planu asaun nasionál kontra violénsia bazea ba jéneru atu hamutuk kria mekanizmu atendimentu ida-ne’ebé di’ak ba vítima sira.

Iha parte seluk, Komandante Polísia VPU-Nasionál, Inspetór Polísia Ricardo da Costa, aprezenta kona-ba kazu violénsia doméstika, violénsia bazea ba jéneru no violénsia seksuál ne’ebé akontese durante ne’e, liuliu iha periódu pandemia COVID-19 no kazu ema tara-aan.

Nia hateten, kazu hirak ne’e pakote ida mai hosi violénsia doméstika, tanba ne’e mak VPU iha ona hanoin katak kualkér kazu ne’ebé mak hetan ameasa tenke aprezenta ka hato’o keixa ba VPU atu nune’e VPU bele kontinua monitoriza kazu hirak-nee.

Hatán ba kestaun hirak ne’e, Sekretária Estadu ba Igualdade no Inkluzaun (SEII), Maria José da Fonseca Monteiro de Jesus hateten SEII mós sei kontinua halo koordenasaun ho Ministériu Edukasaun atu haree oinsá mak sira bele fasilita no apoiu hodi asegura labarik vítima sira-ne’ebé hela iha uma mahon bele asesu nafatin prosesu aprendizajen iha tempu ida agora.

Nune’e mós, SEII sei esforsu komunika ho Ministériu Saúde atu haree prosesu atendimentu ne’ebé di’ak ba vítima inan isin-rua sira, nune’e presiza kolabora hamutuk hodi bele haree oinsá mak instituisaun sira-ne’ebé mak fó asisténsia iha área oioin ba violénsia doméstika no violénsia bazea ba jéneru hodi bele asegura no vítima sira bele hetan duni asisténsia ne’ebé sira presiza.

Entretantu, liga ba kazu membru Governu ida-nia espoza tara-aan ne’e, governante ne’e hateten nia parte sei serbisu hamutuk ho rede referál hotu atu bele asegura katak vítima sira bele hetan atendimentu ne’ebé di’ak no justu ba sira ne’ebé lakon nia vida atu bele hetan justisa iha prosesu justisa no nia parte sei halo esforsu tuir kbiit ne’ebé iha hodi asegura prosesu justisa la’o ho loos.

“Ha’u sei komunika ho ekipa legál hodi haree mós kazu ida-nee. Maske kazu ida-ne’e klase aas (high profile) maibé nia tratamentu justisa tenke hanesan ho kazu hotu-hotu. Katak, ema hotu tenke hakru’uk ba lei ne’ebé iha no ha’u fiar katak sei laiha tratamentu espesiál ba kazu ne’e,” nia haktuir.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here