Pesoál saúde fó vasina ba sidadaun iha sentru saúde iha Dili. Imajen TATOLI/António Gonçalves

DILI, 26 maiu 2021 (TATOLI)–Ministru Prezidénsia Konsellu Ministru, Fidelis Manuel Leite Magalhães, informa, iha tempu badak Governu Timor-Leste sei simu tan apoiu vasina hamutuk 100.000 resin hosi parseiru internasionál sira.

“Foin lalais ne’e, United Nations Children’s Emergency Fund (UNICEF), COVAX Facility no Organizasaun Mundiál Saúde (OMS) prontu atu fó vasina 76.800 maibé iha mudansa katak sira prontu atu aumenta, ne’ebé mai hosi kontribuisaun Governu Nova Zelandia hamutuk 24.000. Ida-ne’e notísia di’ak tanba tempu badak ita sei iha 100.000 hosi COVAX Facility, Nova Zelándia, no Austrália”, Fidelis Manuel Leite relata hafoin ramata reuniaun ezekutivu iha salaun Ministériu Finansa (MF), Aitarak-laran, kuarta ne’e.

Notísia relevante: Abríl-maiu: populasaun kuaze 57.000 simu ona vasina AstraZeneca

Governante ne’e hatutan, apoiu seluk sei iha faze diskusaun, hanesan apoiu hosi Governu Xina no Estadus Unidu Amérika (EUA).

“Enkuantu, apoiu hosi Austrália, kada semana rua vasina mai iha Timór, ne’ebé agradese ba kontribuisaun sira,” nia hatutan.

Portavóz Governu haktuir, iha reuniaun Konsellu Ministru ohin, Governu haksolok rona informasaun hosi Sala Situasaun-Sentru Integradu Jestaun Krize (SS-CIGC, sigla portugés) no Ministériu Negósiu Estranjeiru no Kooperasaun (MNEK) kona-ba implementasaun vasina ne’ebé ninia progresu la’o di’ak.

To’o maiu ne’e, populasaun hamutuk 57.000 iha territóriu tomak ho idade 18 ba leten simu ona vasina AstraZeneca.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here