Inundasaun iha Ponte Comoro 3, domingu (04/04). Imajen TATOLI/António Gonçalves

DILI, 26 maiu 2021 (TATOLI)—Governu liuhosi reuniaun Konsellu Ministru (KM) iha kuarta ne’e, aprova Projetu Dekretu-Lei, ne’ebé aprezenta hosi ekipa Ministériu Interiór, kona-ba apoia vítima asidente grave ka katástrofe.

“Projetu Dekretu-Lei ne’e ho objetivu atu kria enkuadramentu legál klaru no forte hosi apoiu Estadu ba vítima sira-ne’e, nune’e mós ba prosesu rekuperasaun,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha salaun Ministériu Finansa (MF), Aitarak-laran, kuarta ne’e.

Tuir Portavóz Governu, apoiu sira ne’ebé prevee ona iha Dekretu-Lei, destina ba ema singulár sira ne’ebé hetan impaktu katástrofe, situasaun alerta, kontinjénsia ka kalamidade.

“Lista apoiu ne’ebé Governu sei bele konsede ba vítima katástrofe mak hanesan refeisaun no  bee, jéneru alimentár, nesesidade bázika ba uzu pesoál no uzu doméstiku, materiál konstrusaun hodi repara ka halo rekonstrusaun abitasaun, subsídiu apoiu ba traballu reparasaun no rekonstrusaun  abitasaun, subsídiu ba mate, no apoiu psikososiál,” governante ne’e esplika.

Família afetadu dezastre naturál hamutuk 33.375, ne’ebé hosi totál ne’e munisípiu Dili hamutuk 27.622.

Daudaun ne’e, ema hamutuk 2.130 hosi uma-kain 423 hela sentru akollamentu no rejista lakon 41 lakon vida durante dezastre naturál iha fulan abríl.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here