Edifísiu eskola Ensinu Sekundáriu Jerál (ESJ) 04 setembru, Balide, Dili. Imajen Tatoli/dok.

DILI, 26 maiu 2021 (TATOLI)—Família hamutuk 60 ho totál abitante 339 hosi aldeia 01, suku Mascarenhas, postu administrativu Vera Cruz, munisípiu Dili, ne’ebé hela provizóriu iha sentru akollamentu edifísiu eskola sekundária 4 setembru Balide, re-integra ona ba ida-idak nia uma.

Diretór Nasionál Jestaun Risku Dezastre Naturál, hosi Sekretária Estadu Protesaun Sivíl (SEPS), Agostinho Cosme Belo, hateten aprosimasaun ne’ebé SEPS halo ba família sira hodi bele fila hikas ba uma tanba kondisaun uma di’ak ona.

Notísia relevante:SEPS husu atu uma-kain haat hela lai iha eskola 04 setembru

Família hirak-ne’e nu’udár vítima dezastre naturál, tanba bee tama uma no rai monu hanehan, iha 04 abríl, deside evakua mai iha edifísiu SEPS, Caicoli no iha 07 abríl muda ba edifísiu eskola 4 setembru.

“Ita taka ona sentru evakuasuan ne’e, hodi re-integra fila-fali família sira tanba kondisaun uma hahú di’ak no Governu sei apoiu mós materiál ba sira ne’ebé uma at natón no aat totál,’’ Agostinho Cosme  Belo, hateten ba jornalista-sira iha eskola 4 setembru Balide, kuarta ne’e.

Nune’e mós abitante, Jeronimo Afonso, agradese ba apoiu hosi Governu no parseiru ne’ebé durante ne’e fó ona asisténsia iha fatin akollamentu ho di’ak.

“Ha’u-nia uma at natón, tanba uma viziñu mak hanehan ne’ebé besik mota. Maibé, agora di’ak ona no ami agradese ba apoiu hosi Governu durante iha fatin evakuasaun,’’ nia agradese.

Nia husu Governu atu fó mós apoiu materiál konstrusaun, hodi konstrui lalais estragu ne’ebé iha atu bele hela iha fatin seguru.

Durante ne’e família-sira hela iha sentru akollamentu eskola 4 setembru, hetan apoiu ai-hán tasak no la’ós ai-hán ho nesesidade báziku hosi SEPS, Ministéiru Solidariedade Sosiál no Inkluzaun (MSSI), parseiru nasionál no internasionál, hanesan Australian humanitarian partnership, liu hosi Oxfan, Care Internasional, Plan Internasional, Caritas, Wordvision, Ra’es Hadomi Timoroan, no iha mós asisténsia médika hosi profisionál saúde hodi fó tratamentu.

Tuir dadus hosi SEPS, oras-ne’e daudaun iha família 294 ho ema 1.202 mak kontinua hela iha sentru akollamentu 11 ne’ebé sei ativu iha Dili.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here