Mapa Timor-Leste. Imajen/Espesiál

DILI, 26 maiu 2021 (TATOLI)—Ministériu Transporte no Komunikasaun liuhosi Diresaun Nasionál Meteorolojia no Jeofízika (DNMG, sigla portugés) halo observasaun hosi satelite meteorolójiku Himawari-8 no nota katak daudaun kondisaun atmosfera maioria estável ka naroman, ho kalohan balun iha territóriu Timór laran hotu, akompaña ho anin kama’an.

“Anin huu ho velosidade fraku kuaze iha territóriu hotu, exetu iha parte kosteira hosi munisípiu Covalima, Manufahi, Manatuto, Viqueque, Lautém, Rejiaun Administrativa Espesiál Oé-cusse Ambeno (RAEOA) no Ataúro mak anin huu ho nia velosidade moderadu no akompaña ho rajada anin ho intensidade moderadu, ne’ebé bele sustenta to’o 35 km/h,” refere nota ne’ebé Agência TATOLI asesu, kuarta ne’e.

Enkuantu, tuir obsevasaun satelite, nota katak iha rejiaun súl no leste munisípiu Covalima, Manatuto, Manufahi, Viqueque no Lautém, iha kalohan taka no posibilidade akontese udan fraku iha kualker momentu.

Aleinde ne’e, temperatura ar varia hosi sélsiu 17 to’o 29  iha rejiaun foho-leten no sélsiu 22 to’o 31  iha rejiaun tasi-ibun.

Kondisaun laloran iha área kosta norte a’as varia hosi metru 0,5-1,0 (mormál-moderadu) no kosta súl  mak laloran nia a’as varia hosi metru 1,5 to’o 2,0 (moderadu-forte).

Tuir previzaun tempu iha lokraik no kalan, kalohan sei dezenvolve-an taka no iha poténsia ba udan fraku kuaze iha territóriu Timór laran hotu, prinsipalmente iha parte foho sira.

“Anin kontinua huu ho velosidade fraku iha rejiaun montañoza no anin huu ho velosidade moderadu iha rejiaun kosteira hanesan Manatuto, Viqueque, Baucau, Lautém inklui Ataúro, akompaña mós ho rajada anin ho intensidade moderadu ka forte, liuliu iha Lautém no RAEOA ne’ebé bele sustenta ho nia velosidade hosi 45-50 Km/h,” nota ne’e esplika.

DNMG nota eventuál ne’e akontese tanba hetan influénsia hosi sistema meteorolójiku sira ne’ebé maka estabelesidu hanesan, ENSO-Neutro, Madden–Julian Oscillation (MJO), no mós iha efeitu hosi diferensa presaun, ne’ebé maka atualmente observa iha territóriu Timór hodi impulsiona no intensifika briza marrítima.

Maski nune’e,  laiha tendénsia ba udan extremu iha territóriu nasionál.

“Husu ba komunidade ein jerál iha territóriu Timór laran hotu atu nafatin hases-an hosi tipu risku dezastre ne’ebé ita hotu la espera hanesan ai monu, laloran boot, no seluk tan, hodi nune labele afeta ba ita-boot sira-nia vida,” DNMG apela.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here