Reitór UNTL, João Soares Martins hamutuk ho estrutura halo graduasaun online iha salaun Ian Martin, INFORDEPE, Dili. tersa (25/05). Imajen Tatoli/Egas Cristóvão

DILI, 25 maiu 2021 (TATOLI) – Universidade Nasionál Timor Lorosa’e (UNTL) susesu realiza primeiru gradasaun online ba graduandu na’in-241.

Notísia Relevante : 25 maiu, estudante finalista UNTL na’in-241 simu graduasaun online

Graduasaun online UNTL nian iha situasaun pandemia COVID-19 ho tema sentrál “Graduasaun Hosi Knua-Laran”, hetan apresiasaun hosi Ministru Ensinu Superiór, Siénsia no Kultura (MESSK), Longuinhos dos Santos.

Graduandu hirak ne’e hosi Fakuldade Siénsia Saúde, Fakuldade Enjeñaria, Fakuldade Edukasaun Arte Umaniora, Fakuldade Siénsia Sosiál no Fakuldade Ekonomia Jestaun.

Liuhosi nia diskursu iha serimónia graduasaun online ne’ebé konsentra iha Salaun Ian Martin, INFORDEPE, Dili,  Ministru Longuinhos dos Santos, hateten graduasaun ho sistema online ne’e foin mak akontese ba dahuluk hosi graduasaun sira hotu ne’ebé UNTL realiza ona no Ministru Longuinhos dos Santos haree besik katak estrutura UNTL ho esforsu tomak ultrapasa duni limitasaun sira tanba kauza hosi pandemia COVID-19.

“Ha’u hakarak hateten graduasaun online ne’e foin akontese ba dahuluk iha Instituisaun Ensinu Superiór Públiku nia laran, graduasaun online ne’e realiza tanba limitasaun husi kauza pandemia COVID-19 ne’ebé Timor-Leste no mundu  enfrenta,” Ministru Longuinhos dos Santos tenik.

Governante ne’e afirma katak realidade foun ne’e obriga Governu ho Instituisaun Ensinu Superior Públiku buka atu adapta duni ho mekanizmu-sira hodi bele ajusta-an iha sistema foun nia laran tanba ne’e estrutura UNTL tomak merese hetan parabens tanba konsege solusiona alternativa ida ne’e hodi realiza graduasaun online ho susesu.

Ministru Longuinhos mós hato’o parabens ba graduandu hotu ne’ebé simu ona graduasaun online ho pasiénsia tomak hein to’o ohin loron bele hetan graduasaun online ne’e.  Nia  fiar katak futuru graduandu-sira nian la termina iha ne’e de’it, maibe graduasaun ne’e nu’udar dalan ida atu loke oportunidade hodi kapasita liután koñesimentu no abilidade iha faze tuir mai.

Iha sorin seluk Magnífiku Reitór UNTL, João Soares Martins, akresenta graduasaun ida-ne’e úniku tebes hosi graduasaun ne’ebé UNTL realiza ba dala 20-resin ona. Hanesan lider másimu iha Instituisaun Ensinu Superiór Públiku ne’e  orgullu tanba konsege realiza duni graduasaun online lao ho di’ak.

“Ami mós orgullu tan ne’e esperiénsia foun ida, ami bele halo preparasaun ho di’ak no hodi realiza graduasaun online ne’e hosi inísiu to’o remata ho susesu. Ida ne’e oportunidade dahuluk ami hein karik estudante segunda faze hakarak hetan graduasaun online, ami prontu atu atende iha ámbitu COVID-19,” João Soares Martins afirma.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here