Prezidente Konsellu Administrasaun RTTL, E.P, José António Belo ‘Taraleu’. Imajen TATOLI/António Gonçalves

DILI, 25 maiu 2021 (TATOLI) – Rádiu Televizaun Timor-Leste, Empreza Públiku (RTTL.EP), tersa ne’e, selebra akordu kooperasaun ho Universidade Nasionál Timor Lorosa’e (UNTL) hodi fasilita funsionáriu RTTL.EP nian tuir formasaun iha universidade públiku ne’e.

Notísia Relevante : RTTL.EP-TATOLI.IP Diskute Futuru Kooperasaun Ho CENJOR No Lusa

Hafoin asina MoU entre parte sira-ne’e, prezidente konsellu administrasaun RTTL.EP, José António Belo, esplika serimónia asinaakordu kooperasaun entre parte rua hanesan faze inísiu atu hametin filafali kooperasaun uluk akontese ona. Tanba RTTL.EP hakarak haberan liután ninia ema iha UNTL hodi hetan kapasitasaun iha area oioin atu profesionaliza liután RTTL ba oin.

“Ami halo kooperasaun ho UNTL ne’e tanba hakarak hakbiit ami ninia rekursu umanu la’ós iha de’it area jornalizmu, maibé iha mós area seluk hanesan agrikultura, edukasaun, saúde, ekonomia, defeza, seguransa, lingua no saida de’it mak UNTL iha, ami hakarak koloka hotu ami nia ema iha ne’ebá atu haberan liután sira-nia kapasidade no koñesimentu,” José António Belo argumenta.

José Belo afirma importánsia hosi kapasitasaun rekursu umanu iha UINTL ne’e atu profesionaliza instituisaun ba tempu naruk. Maibé sei iha akordu ho funsionáriu sira molok atu hetan fatin hodi estuda iha UNTL.

“ha’u hanoin ona tenke iha akordu mós ho funsionáriu-sira iha RTTL.EP ne’ebé estuda iha UNTL. Atu nune’e sira remata ona estudu bele filafali mai servisu bá RTTL.EP,”  nia tenik.

Magnífiku Reitór UNTL João Soares Martins, afirma mós katak memorandum entendimentu ne’e atu fó espasu ba funsionáriu no jornalista RTTL.EP atu hetan mós formasaun iha UNTL.

João afirma tan, MoU ne’e sei loke espasu ba UNTL atu habelar ninia atividade akadémiku peskiza no servisu komunitária ne’ebé hala’o iha territóriu nasionál.

Jornalista       : Tomé Amado

Editór             : Francisco Simões

HAKEREK NO HATÁN

Please enter your comment!
Please enter your name here