Asesor Senior MKAE, Estanislau Aleixo da Silva. Imajen TATOLI/Egas Cristóvão

DILI, 25 maiu 2021 (TATOLI)—Timor-Leste liuhosi ekipa negosiasaun adezaun ne’ebé lidera hosi Ministériu Koordenadór Asuntu Ekonómiku (MKAE), partisipa iha semináriu virtuál Organizasaun Mundial Komérsiu (OMK) ba da-haat, hodi fahe esperiénsia.

Maski Timor-Leste daudaun ne’e nu’udar país observadór ne’ebé iha prosesu adezaun, maibé sai ezemplár, tanba ne’e hetan konvite hosi Sekretariadu OMK iha Jenebra, Suiça, hodi fahe esperiénsia ba país Somália.

Tuir nota ne’ebé Agência TATOLI asesu iha tersa ne’e, iha sorumutuk ne’e, Asesor Senior MKAE, Estanislau Aleixo da Silva, fahe persepsaun kona-ba situasaun atuál adezaun ba OMK inklui  esperiénsia pozitivu komérsiu ne’ebé konsege ultrapasa.

Notísia relevante: MKAE lidera negosiasaun adezaun Timor-Leste ba OMK

Aleinde ne’e, Reprezentante hosi Timor-Leste sei fahe vizaun krítika kona-ba desizaun komersiál ne’ebé Governu  Somália presiza ezekuta, liliu kona-ba konseitu no operasaun hodi hametin liña koordenasaun entre ajénsia ne’ebé serbisu iha área ekonomia.

Nune’e mós, Timor-Leste sei fahe mós esperiénsia seluk kona-ba mekanizmu konsultasaun ne’ebé presiza  implementa ho parte interesada externa no instituisaun relevante seluk kona-ba elaborasaun polítika komersiál efikásia.

Somália hahú elabora planu First Working Party Meeting desde dezembru 2016, maibé to’o agora seidauk realiza.

Tanba ne’e, Sekretariadu OMK konvida Timor-Leste fahe esperiénsia pozitivu hirak ne’e liuhosi  enkontru Second Working Party Meeting.

Atividade virtuál ne’e ofisialmente sei enserra hosi Embaixadór Suiça nian ba OMK, ne’ebé oras ne’e asume pozisaun nu’udar Xefe Adjuntu Misaun OMK nian iha Jenebra, Mikael Anzén.

Governu Timor-Leste hamutuk ho país 24 sira seluk, sai nu’udar nasaun observadór hodi akompaña prosesu tomak, kona-ba rekezitu sira atu sai membru OMK hanesan ho nasaun 165 sira seluk.

OMK nu’udar organizasaun ne’ebé trata regra komérsiu entre nasaun, ho objetivu hodi garante atividade komersiál hotu la’o ho livre ho nia predisaun hotu.

Sorumutuk virtuál ne’e hetan mós partispasaun másimu hosi Banku Mundiál, ne’ebé sei hetan introdusaun hosi Embaixadora Zhanar Aitzhanova, hosi Kazaquistaun, ne’ebé oras ne’e asume papél nu’udar Presidente negosiasaun serbisu OMK nian.

Iha loron 13 juñu 2017, Governu liuhosi reuniaun Konsellu Ministru aprova memorandu rejime komérsiu esternu vijente iha Timor-Leste.

Memorandu ne’e, hanesan desizaun ida atu fó biban ba MKAE lori dokumentu ba OMK atu hahú halo negosiasaun ho organizasaun mundiál ne’e.

Tanba Timor-Leste hanesan observadór iha OMK maka iha ona grupu traballu hanesan komité traballu atu halo negosiasaun.

Iha grupu traballu ne’e, Timor-Leste husu Portugál atu prezide tanba sira iha esperiénsia barak kona-ba kestaun ne’e no fó apoiu bainhira halo negosiasaun atu adere.

Nune’e, bainhira halo negosiasaun presiza lori memorandu free trade agreement kona-ba rejime komérsiu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here