SEPS harii tenda ba família hamutuk 41 iha suku Manleuana. Imajen/média SEPS.

DILI, 25 maiu 2021 (TATOLI)—Sekretária Estadu Protesaun Sivíl (SEPS), harii tenda ba família hamutuk 41, iha suku Manleuana, postu administativu Dom Aleixo, munisípiu Dili.

Xefe ekipa monitorizaun ba sentru evakuasaun hosi SEPS, Mariano Lopes, hateten prosesu monta lona ne’e, ekipa halo uluk asesmentu ba família ne’ebé ho kondisaun uma hetan estragu totál durante inundasaun iha 04 abríl.

Notísia relevante:SEPS distribui apoiu emerjénsia ba família 744 iha Manleuana-Comoro

Tenda hirak-ne’e, SEPS hetan apoiu hosi Governu Autrália hamutuk 220, ne’ebé distribui hodi harii ona balun iha komunidade Metinaro, Masin Lidun Tasi-tolu, no Manleuana rasik.

“Monta tenda provizóriu ba família afetadu-sira iha-ne’e hanesan sentru evakuasaun, hodi bele utiliza provizóriu,” Mariano Lopes, hateten ba jornalista-sira iha sede suku Manleuana, tersa ne’e.

SEPS serbisu hamutuk ho Governu Austrália liuhosi ninia ajénsia parseiru umanitária hanesan Oxfan, Care Internasional, Plan Internasional, Caritas, Wordvision, Ra’es Hadomi Timoroan, durante loron rua monta lona iha sede suku Manleuana no ohin finaliza.

Mariano Lopes agradese ba parseiru sira ne’ebé durante ne’e sempre serbisu hamutuk ho SEPS, hodi halo atuasaun iha situasaun kalamidade.

Nune’e mós Xefe Aldeia Lemokari, suku Manleuna, Estaquio Tilman, hateten durante ne’e família-sira utiliza de’it lona ne’ebé ladún seguru atu hela ho família, maibé ho apoiu Governu tulun tebes komunidade.

“Hanesan autoridade lokál, ami agradese no orgullu ho apoiu Governu tanba bele sente hakmán família afetadu-sira bele iha uma mahon  hodi satan udan, loron no anin,” nia hateten.

Tuir dadus hosi autoridade suku Manleuana, iha família 978 mak afetadu ba dezastre naturál ne’ebé akontese iha 04 abríl no hosi númeru ne’e família balun uma hetan estragu kamán no balun aat totál.

SEPS mós durante ne’e fó ona apoiu ai-hán no la’ós ai-han ba família hirak-ne’e.

Tuir dadus hosi Governu, to’o 18 maiu 2021, Ministériu Administrasaun Estatál (MAE) hamutuk ho liña ministériu-sira halo intervensaun distribui ona apoiu umanitáriu hanesan ai-han no la’ós ai-han ba família afetadu dezastre naturál, hamutuk 33.375 iha territóriu nasionál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here