Tékniku BTL.EP normaliza hikas sistema bee bomba subteranu Mascareñas, ne’ebé distribuisaun bee la’o normál ona iha area Quintal boot-kiik, St. Cruz, Bemori, no Mascareñas, kinta (08/04). Imajen/BTL

DILI, 25 maiu 2021 (TATOLI)—Ekipa hosi Bee Timor-Leste, Empreza Públika (BTL, E.P) kuaze konklui serbisu rekuperasaun sistema distribuisaun bee-moos ne’ebé hetan estragu tanba dezastre naturál ne’ebé akontese iha loron 04 abríl.

“Ita-nia normalizasaun no rekuperasaun sistema bee-moos iha kapitál Dili atinje ona 95%, ne’ebé komunidade maioria mak asesu ona bee-moos,” Prezidente Konsellu Administrasaun, BTL,E.P, Carlos Peloi dos Reis, informa iha Palásiu Governu, tersa ne’e.

Dezastre naturál ne’ebé akontese foin lalais konsege estraga kanalizasaun bee-moos hamutuk 26.

“Bomba bee ita kuaze finaliza hotu ona, falta ida iha Camea nian, maibé ita-nia ekipa esforsu hela atu hadi’a no tempu besik bele normaliza ona,” nia akresenta.

Tuir nia, sistema bee-moos ne’ebé hetan estragu maka’as liu mak iha toha-metan iha mota ulun, maibé konklui ona.

“Ita konsege normaliza sistema ne’e iha sábadu semana kotuk, tanba ne’e komunidade maioria iha área Manleuana, Bairro Pité, Cacau-lidun no Palapasu inklui fatin seluk tan asesu ona bee-moos,” nia hatutan.

Maski nune’e, sistema abastamentu bee-moos ne’ebé kapta hosi mota seidauk bele hadi’a tanba presiza kustu adisionál atu muda kanu sira atu la liu mota-laran.

Kustu estimasaun ba rekuperasaun sistema distribuisaun bee-moos 26 hamutuk millaun $2,5.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here