iklan

EKONOMIA, HEADLINE

Produsaun rai-laran seidauk sufisiente sustenta konsumu nasionál

Produsaun rai-laran seidauk sufisiente sustenta konsumu nasionál

Hare iha Atabae. Imajen TATOLI/António Gonçalves

DILI, 25 maiu 2021 (TATOLI)-Diretora Jerál Ministériu Agrikultura no Peskas (MAP), Maria Odete do Ceo Guterres, hateten, produsaun foos iha rai-laran seidauk to’o atu sustenta konsumu nasionál kada tinan, tanba ne’e sei presiza halo importasaun.

“Ita ko’alia kona-ba konsumu nasionál seidauk to’o, tanba haree ba ita-nia populasaun hamutuk millaun 1,3 ne’e presiza tonelada 130.000 kada tinan, enkuantu produsaun agora daudaun ita halo previzaun bele to’o tonelada 60.000, tanba ne’e ita sei presiza importa nafatin tonelada 70.000,” Diretóra Jerál MAP, Maria Odete do Ceo Guterres, informa iha salaun Palácio das Cinzas, Caicoli, tersa ne’e.

Notísia relevante: Previzaun MAP: tinan 2021 produsaun foos bele atinje tonelada 60.000

Tanba ne’e, polítika ministériu nian mak atu mantein hasa’e produsaun , halo diversifikasaun produtu, espansaun ba área potensiál no aplika teknolojia produsaun.

“Tinan kotuk  ita tenta  halo demostrasaun iha kanál irrigasaun sia, kada irrigasaun hetan ektare 40,  ne’ebé kada tinan bele kontribui produsaun toneladas 16.  Tinan ne’e, ami atu aumenta tan ektare 40 kanál irrigasaun no agora ita iha ektare 80 iha área produtivide,” nia akresenta.

Nia dehan, maski daudaun ne’e iha situasaun Serka Sanitária no Konfimantu Domisiliáriu Jerál, maibé MAP nafatin mantein hasae’e produtividade ba tinan ne’e.

“Ami nafatin halo  koordenasaun liuhosi  liña informasaun hodi aplika nafatin prátika agrikultura ba ita-nia agrikultór sira no  hadi’a infraestrutura agríkola,  tanba foin daudaun kanál irrigasaun barak maka a’at, maibé ami nafatin halo esforsu hodi hadi’a, nune’e bele salva ita-nia natar sira,” nia akresenta.

Antes ne’e, iha agostu 2020, Governu liuhosi CLN halo akizisaun foos hosi Vietname ho kuantidade tonelada 30.000 ho kustu millaun $15, tanba iha situasaun emerjénsia ne’ebé kuaze nasaun hotu aplika Serka Sanitária no demanda konsumu nasionál a’as.

Maski nune’e, daudaun iha armazen Sentru Lojíztika Nasionál (CLN, sigla portugés) falta de’it tonelada 18.400.

Jornalista: Natalino Costa

Editora: Julia Chatarina

iklan
iklan

Leave a Reply

iklan
error: Content is protected !!