Prezidente Repúblika, Francisco Guterres Lú Olo, simu vasina AstraZeneca doze dahuluk, tersa (25/04/2021). Imajen/Mídia PR.

DILI, 25 maiu 2021 (TATOLI)—Prezidente Repúblika, Francisco Guterres Lú Olo, tersa ne’e akompañadu hosi espoza Cidália Nobre Lopes Mouzinho Guterres simu ona vasina AstraZeneca doze dahuluk nian iha Palásiu Prezidénsia Nicolau Lobato, Bairru Pite, Dili.

“Ohin, ha’u ho ha’u-nia funsionáriu hotu atu bele simu vasina ida-ne’e hanesan meiu hosi Prezidente Repúblika hodi koopera ho Estadu hodi halo prevensaun,” Prezidente Repúblika hateten liuhosi nia diskursu antes atu simu vasina AstraZeneca ne’e.

Xefe Estadu husu ba populasaun tomak atu dispoin nia aan atu simu vasina AstraZeneca tanba vasina iha ona para nune’e bele prevene no populasaun sira bele hala’o sira-nia moris loron-loron nian.

“Se ida-ne’e ita lahalo bainhira mak ita halo. Se ita kontinua de’it ho situasaun ida-ne’e, nune’e mak bainhira livre. Tanba ne’e, ha’u husu ita hotu koopera para simu vasina bá, hodi proteje ita-nia aan, família no ba ita-nia komunidade tomak,” Lú Olo dehan.

Lú Olo hateten, hahú kedas Estadu hola medida oinsá Timor-Leste halo prevensaun ba moras COVID-19 di’akliu ba povu Timro-Leste no medida ne’ebé Estadu sempre hola mak estadu emerjénsia, atu nune’e bele prevene moras COVID-19 labele da’et ba populasaun sira.

Prezidente Repúblika, Francisco Guterres Lú Olo, no espoza Cidália Nobre Lopes Mouzinho Guterres hasai retratu hamutuk hafoin simu vasina AstraZeneca doze dahuluk, tersa (25/05/2021). Imajen/Mídia PR.

“Ida-ne’e esforsu tomak ne’ebé Governu halo no obrigasaun Estadu nian tenke halo duni desizaun sira-ne’e. Klaru desizaun sira-ne’e hosi fali sorin seluk mós provoka fali povu nia-moris ba loron-loron nian. Governu halo ekilibriu ba moras ne’e ho ida hamlaha nian maibé Governu esforsu nafatin. Resposta loloos ba moras ida-ne’e mak laiha aimoruk ida mak atu kura, hanesan medida prevensaun sanitária ne’ebé fó sai no liuliu fó vasina tanba iha Timor-Leste hetan ona kontaminasaun komunitária,” nia hateten.

Foun-foun bainhira vasina ne’e to’o mai Timor-Leste, nia dehan, Primieru-Ministru Taur Matan Ruak, ministru sira inklui Sentru Integradu Jestaun Krize (SIJK) hakarak tebes PR atu simu vasina iha altura ne’ebá, maibé PR fó uluk lai ba front line sira no komunidade vulnerável liu mak komunidade.

“Bainhira vasina to’o mai, Primeiru-Ministru Taur Matan Ruak hakarak tebes ha’u atu simu vasina iha altura ne’ebá, maibé ha’u dehan ba sira katak tenke fó uluk lai ba ita-nia maluk iha front line ho komunidade depois ha’u ikus mós di’ak, la problema. Sira ne’ebé vulnerável liu mak ita-nia komunidade,” PR hateten.

Prezidente Republika ho espoza PR ho Gabinete Prezidénsia Repúblika hamutuk ho nia funsionáriu kuaze 200-resin mak ohin (tersa, 25/04) simu vasina AstraZeneca ba doze dahuluk nian.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here