Estensionista hosi MAP no Agrikultór sira koko mákina ko’a hare iha Hatas, Bobonaro. Imajen/Austrália iha Timor-Leste

DILI, 25 maiu 2021 (TATOLI)—Ministériu Agrikultura no Peska (MAP) halo previzaun ba tinan ne’e, agrikultór bele halo produsaun hare ne’ebé konverte ba foos atinje tonelada 60.000.

“Ami-nia previzaun ba produsaun hare tinan ne’e 10%, ita konverte karik produsaun bele sa’e tonelada 59.000 to’o 60.000,” Diretóra Jerál Ministériu Agrikultura no Peska (MAP), Maria Odete do Ceo Guterres, informa iha salaun Palácio das Cinzas, Caicoli, tersa ne’e.

Enkuantu, produsaun tinan 2020 hamutuk tonelada 40.000, maski antes ne’e MAP halo previzaun atu atinje tonelada 78.000 maibé tanba situasaun pandemia COVID-19 la konsege to’o meta.

Notísia relevante: Previzaun MAP: Tinan 2020 Bele Halo Produsaun Hare Tonelada 78.000

Atu atinje meta, MAP kontinua ho mekanizmu intensifika produtividade no kria kondisaun hadi’a irrigasaun a’at no seluk tan.

“Polítika ministériu nian mak atu mantein hasa’e produsaun , halo diversifikasaun produtu, espansaun ba área potensiál no aplika teknolojia produsaun,” ni akresenta.

Iha maiu tinan ne’e, MAP lansa époka dahuluk kolleta hare ektare 75 iha aldeia Helesu, suku atabae, postu administrativu Atabae, munisípiu Bobonaro.

Bazeia ba rezultadu sensu agríkola 2019, hatudu katak 60% agregadu familiár nasionál halo atividade agrikultura no propriedade agríkola okupa estensaun ektare 219.250.

Hosi númeru ne’e, munisípiu ho área propriedade agríkola família boot liu maka Bobonaro ho propriedade ektare 41.000 resin, Ermera ho ektare 40.000 resin no Baucau ho propriedade 25.000 resin, enkuantu munisípiu sira ne’ebé área agríkola menus liu maka Lautém ektare 8.555 no Manatuto ektare 3.371.

Rezultadu ne’e hatudu katak iha 141.738 propriedade agríkola, ne’ebé 141.141 maka pertense ba propriedade familiár no 597 ba instituisaun privada sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here