Prokuradór Jerál Repúblika (PGR-sigla portugés), Alfonso Lopez, hala’o enkontru dahuluk ho Prezidente Repúblika, Francisco Guterres Lú Olo. Imajen/Mídia PR.

DILI, 25 maiu 2021 (TATOLI)—Prokuradór Jerál Repúblika (PGR-sigla portugés), Alfonso Lopez, tersa ne’e hala’o enkontru dahuluk ho Prezidente Repúblika, Francisco Guterres Lú Olo hodi relata kona-ba servisu administrativu no prosesu sira ne’ebé oras ne’e la’o hela iha Ministériu Públiku.

Notísia Relevante: PR nomea Alfonso Lopez nu’udar Prokuradór Jerál Repúblika

“Ne’e primeiru aktu mai reuniaun ho Prezidente Repúblika Francisco Guterres Lú Olo, no pontu balun mak ohin ha’u hato’o ba Prezidente Repúblika liuliu depois simu pose iha 28 abríl,” Prokuradór Alfonso Lopez hateten ba jornalista sira, iha Palásiu Prezidénsia, Bairru Pite, Dili, tersa ne’e.

Nia informa ba PR katak iha semana sira dahuluk iha nia mandatu, nia parte buka hatene pontu situasaun iha instituisaun refere liuhosi avaliasaun ba relatóriu servisu mós lala’ok ezekusaun orsamentu jerál Estadu 2021 no rekursu hotu ne’ebé disponível hodi bele mellora dezempeñu instituisaun ne’e nian.

Hanesan Prokuradór Jerál foun, nia mós aprezenta-aan no kumprimenta responsável instituisaun relevante sira nasaun nian no parseiru sira, inklui Prokuradór Jerál Repúblika sira hosi nasaun ho lian ofisiál português ka Comunidade dos Países de Língua Portuguesa (CPLP).

“Tanba antes ne’e halo ona akordu bilaterál no kooperasaun, entaun ho ida-ne’e atu mantein lasu amizade ho parseiru sira-ne’e,” Alfonso hateten.

Nia mós hato’o ba Prezidente Repúblika kona-ba konstrusaun ba edefísiu tribunál nian ne’ebé mak iha Colmera no iha Lospalos ne’ebé hetan difikuldade tanba estadu emerjénsia ne’ebé aplika serka sanitaria no konfinamentu obrigat’oriu, ne’ebé labele labele hola no lori materiál konstrusaun atu halo konstrusaun.

“’Ida-nee hanesan maiór atensaun ba Prokuradór Jerál Repúblika. Tanba, ita rona katak futuramente planu estratéjiku 2030 tenke habelar hodi lori justisa besik ba povu. Ida-ne’e mak ohin ha’u mai hato’o ba Prezidente Repúblika,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here