Dokumentu kontratu falsu. Imajen/MOP

DILI, 25 maiu 2021 (TATOLI)–Ministériu Obra Públika (MOP) sei prosesa kompañia Konkorsu Unido. Lda (naran kompañia tuir karta falsu) ba Ministériu Públiku (MP) no Polísia Sientífiku Investigasaun Kriminál (PSIK) tuir dalan legál tanba falsifika dokumentu kontratu.

Kompañia ne’e falsifika kontratu ka autorizasaun serbisu ba projetu loke estrada alternativu hosi suku Laku-Mesak, Uma Naruc, Uma Caduac, estrada Laclo to’o Hatuconan, munisípiu Manatuto.

“Hakarak informa ba públiku, setór privadu nasionál no internasionál sira katak, Diresaun Nasionál Aprovizionamentu (DNA) nunka prodúz dokumentu sira sein tuir prosesu administrasaun bazeia ba lei no regra sira ne’ebé vigora. Gabinete Ministru, liuliu Ministru rasik nunka autoriza kualker aktus ne’ebé la liuhosi prosesu legál, tanba ne’e sei la tolera hahalok sira ne’e,” refere nota ne’ebé Agência TATOLI asesu, tersa ne’e.

Karta ne’e lansa hosi ema irresponsável iha loron 21 jullu 2020, ho karimbu no asinatura falsu hosi Ministru Obra Públika, Salvador Eugênio Soares dos Reis Pires.

Nune’e, MOP husu kompañia refere atu labele mobiliza ekipamentu ba prosesu konstrusaun loke estrada iha suku sira ne’ebé mensiona.

Ba kestaun ne’e, Ministru apela kompañia nasionál no internasionál, bainhira hetan ou simu dokumentu falsu, bele informa direta ba autoridade kompetente no ba ministériu kompetente hodi prosesa autór falsifikasaun dokumentu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here