Irrigasaun. Imajen/Espesiál

DILI, 25 maiu 2021 (TATOLI)--Diretora Jerál Ministériu Agrikultura no Peskaa (MAP), Maria Odete do Ceo Guterres, hateten, dezastre naturál ne’ebé akontese foin lalais konsege estraga irrigasaun iha fatin balun.

“Inundasaun iha loron 04 abríl, iha irrigasaun 17 maka konsege hetan estragu, balun iha nível  todan no balun kama’an, inklui irrigasaun boot ida iha Manatuto,” dehan Nia ba Jornalista sira iha salaun Ministeriu Saude, Palacio da Cinzas Caicoli, Tersa ohin.

Kanál irrigasaun ne’ebé hetan estragu maka hanesan Larisula Manufahi, Karau-ulun, Webaba no Suia Kasa, Kailaku no seluk tan.

Nia dehan, irrigasaun ne’ebé maka hetan estragu, MAP halo ona koordenasaun ho Diretór Servisu Munisipál MAP, atu komunika ba kompañia lokál hodi halo atendimentu nune’e halo normalizasaun.

Notísia relevante: MAP hahú identifika natar no irrigasaun hetan estragu dezastre naturál

Tanba ne’e, esforsu hotu ministériu halo, maski iha períodu serka sanitária no konfinamentu domisiliáriu jerál, ne’ebé ho limitasaun servisu ministériu, maibé Ministru Agrikultura no Peska, Pedro dos Reis, fó ona orientasaun ba Diretór Servisu Munisipál MAP iha  munisípiu  hotu hodi  halo koordenasaun no intervesaun.

Nune’e mós, iha natar balun a’at iha munsípiu durante dezastre naturál, maibé MAP konsege salva ektare 300 iha Manatuto, ne’ebé daudaun atu kolleta hare.

“Hanesan estragu boot maka foin daudaun iha Laclo, Manatuto hamutuk ektare 1.200, maibé fatin seluk estragu kiik,” nia akresenta.

Antes ne’e, MAP halo planu iha tinan ne’e, sei hadi’a maka Maliana II, Webaba, Raibere, Bebui, Webaba, Bonuk no seluk tan, ho kustu miliaun $2 resin, ne’ebé orsamentu prevee ona.

Tuir dadus hosi MAP, daudaun ne’e, natar iha rai ektare 2.026,74 mak sei utiliza sistema tradisionál, katak hare kari de’it iha natar laran, du’ut la hamoos, kontrolu ba adubu ladi’ak no rai ektare 9.062 mak hare kari, fokit kuda fali, maibé la kuda ho liña no kontrola ba adubu, pestisida no bee ladún di’ak.

Enkuantu, ektare 771 maka uza ona sistema prátika no rai ektare 57 mak implementa ona sistema agrikultura ho di’ak, katak hare kuda ho liña, kontrola ba adubu, pestisida, bee di’ak no laiha du’ut.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here