Baunilla iha plantasaun CCT Railaco. Imajen Tatoli/António Gonçalves

DILI, 25 maiu 2021 (TATOLI)—Komisaun D ne’ebé trata asuntu Ekonomia no Dezenvolvimentu, rekomenda ba Ministériu Agrikultura no Peska (MAP) atu fó importánsia ba baunilla, maek no ai-garahu tanba ho valór ekonómika foin aas iha mundu.

Notísia Relevante: MAP Promete Rezolve Folin Baunilla

“Rekomenda ba Ministériu Agrikultura no Peska atu tau konsiderasaun iha planu orsamentu anuál ba preparasaun no plantasaun produtu sira-ne’ebé ekonomikamente folin aas tebes iha merkadu mundiál hanesan baunilla, maek no ai garahu,” Sekretáriu Meza Komisaun D, Deputadu Alexandrino Cardoso da Cruz, ne’ebé akompaña hosi Prezidente Komisaun D, Deputadu Antoninho Bianco, aprezenta relatóriu fiskalizasaun ne’e ba plenária, segunda ne’e

Prezidente Komisaun D, Deputadu Antoninho Bianco, reforsa bainhira komisaun hala’o viajen traballu ba Ermera no fatin seluk komunidade kuda ona baunilla ne’e.

“Baunilla ne’e komunidade barak ma kuda ona hanesan iha Ermera, Ainaro, Suai no parte Aileu nian. Baunilla ne’e nia folin ne’e aas tebes, nia hún ida kuandu ita kolleta bele hetan kilógrama lima, ne’e mínimu. Se ita investe iha-ne’e, Timor-Leste nia osan bele mai hosi baunilla, ami hanoin katak ita bele halo investimentu iha-ne’e,” nia dehan.

Entretantu, Prezidente Komisaun D ne’e mós esplika kona-ba ai-garahu nian, ne’ebé Timor-oan ida hosi Maliana kuda tiha ona ektare rua.

“Maliana-oan ne’e hahú serbisu iha Timor Plaza maibé depois nia hatene ai-garahu ne’e ho folin boot entaun nia sees tiha no nia muda nia moris. Se ida-ne’e ita investe didi’ak entaun Timor-Leste nia ekonomia bele mai hosi baunilla no bele mós ai-garahu,” nia dehan.

Nune’e mós, nia dehan, maek kuaze moris iha fatin hotu iha territóriu nasionál, tanba ne’e Governu liuhosi Ministériu Agrikultura no Peska presiza konsidera iha planu orsamentasaun kada tinan fiskál.

“Ema barak iha mundu ne’e presiza maek ne’e. Uluk ita la hanoin, agora ita bele hanoin ona atu investe, maek, baunilla no ai-garahu nian la to’o tinan barak. Ita bele dehan investimentu ne’e ba médiu prazu bele hetan ona rezultadu,” Prezidente Komisaun D ne’e informa.

Notísia Relevante: CCT konsege esporta ona Baunilla tonelada rua

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here