Ekontru KONSSANTIL iha salaun Ministériu Saúde (MS), Palásiu Sinzas, Caicoli, tersa (25/05/21). Imajen/Média MS.

DILI, 25 maiu 2021 (TATOLI)—Liña  ministériu ne’ebé involve iha Komisaun Nasionál  Serbisu Tékniku ba Nutrisaun Timor Leste (KONSSANTIL), aprova ona asuntu importante neen ne’ebé sei aprezenta iha Konsellu Ministru (KM).

“Asuntu neen ne’ebé aprovadu sei ba aprezenta iha KM no sei haree mós kona-bá estatutu KONSSANTIL,’’ Ministru Agrikultura no Peska hanesan Prezidente KONSSANTIL, Pedro dos Reis, hateten ba jornalista-sira iha salaun Ministériu Saúde (MS) Palásiu Sinzas, Caicoli, tersa ne’e.

Notísia relevante:KONSSANTIL-FAO Halo Evaluasaun Servisu Hamutuk

Asuntu dahuluk aprova partisipasaun Timor-Leste (TL) iha simeira sistema ai-han mundiál nu’udár  desizaun konjunta.

Daruak, aprova  pesoál  ne’ebé indijitadu nu’udár pontu fokál konvokadór  nasionál no ekipa atu halo preparativu no prosesu hodi halo submisaun planu partisipasaun no hetan aprovasaun iha KM.

Datoluk, kona-bá realizasaun Reuniaun  Estraordináriu CONSAN-CPLP iha semana daruak juñu 2021 no DN-CPLP atu manifesta Estadu membru TL nia interese.

Dahaat, Ministériu Negósiu Estranjeiru no Kooperasaun (MNEK) mak sei sai uma-na’in hodi fasilita  videokonference  durante  estraordináriu  CONSAN-CPLP.

Dalima, dokumentu planu kontijénsia  kluster nutrisaun  no resposta seguransa ai-han  no nutrisaun ba inundasaun no seguransa ai-han, hodi lori ba Konsellu Ministru antes adopta iha implementasaun.

Daneen, funsiona hikas KONSSANTIL  no sei hamutuk halo revizaun  ba estatutu  iha futuru.

“KONSSANTIL harii iha 2017 no primeira-vez hala’o enkontru ho nível ministériu atu foti desizaun hodi avansa ba renovasaun estututu tanba to’o agora lei ba komisaun ne’e seidauk aprova iha Konsellu Ministru,’’ Pedro  dos Reis subliña.

Iha fatin hanesan Vise-Ministru Saúde, Bonifácio Maucoli dos Reis, hateten setór saúde iha papél esensiál iha nutrisaun, tanba ne’e Ministériu Saúde mós hola parte iha KONSSANTIL hanesan obrigasaun no ksolok ida, enkuantu nível Ministru hosi KONSSANTIL ne’e bele realiza iha Ministériu Saúde.

“Ita-nia enkontru aborda no foku atu hetan kompromisiu konjunta kona-bá prioridade ne’ebé bele rezolve hanesan inseguransa ai-han, normál nutrisaun iha TL liu-liu iha situasaun serka sanitária relasiona ho pandemia COVID-19,’’ Bonifácio Maucoli dos Reis, subliña.

Ministériu ne’ebé hola parte iha KONSSANTIL maka, Ministériu Agrikultura no Peskas (MAP),  Ministériu Edukasaun Joventude no Desportu (MEJD),  Ministériu Saúde (MS), Minsitériu Obra Públika (MOP), Ministériu Solidariedade Sosiál no Inkluzaun (MSSI), Ministériu Turizmu Komérsiu no Indústria (MTKI), Ministériu Negósiu Estranjeiru no Kooperasaun (MNEK) inklui Sosiedade Sivíl.

Jornalsita: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here