Intervensaun IGE hasai sedimentasaun iha drenajen Besik STM, iha área Bekusi. Imajen/IGE

DILI, 26 maiu 2021 (TATOLI)—Ekipa interministeriál halo ona levantamentu dadus ba projetudrenajen no saneamentu munisípiu Dili, nune’e identifika uma-kain 400 afetadu ba projetu.

“Ita-nia ekipa interministeriál halo ona levatementu dadus, ne’ebé uma-kain hamutuk 400 afetadu ba projetu drenajen no sanemantu, sei indemniza ho totál kustu millaun $3, maibé dadus kompletu sei hein ekipa submete relatóriu,” Prezidente Konsellu Administrasaun Bee Timor-Leste (BTL, E.P), Carlos Peloi dos Reis, informa iha Palásiu Governu, tersa ne’e.

Notísia relevante: MOP aprezenta planu mestre drenajen-saneamentu Dili ba PM

Tuir Direjente ne’e, pandemia impede ekipa atu submete relatóriu analiza no avalia projetu, maski nune’e serbisu kuaze konklui.

“Ita haree uma-kain afetadu ne’e kuaze iha Dili laran tomak no saneamentu ne’e ita foku liu ba tratamentu bee foer iha área Bebonuk nian,” nia akresenta.

Ekipa liña ministeriál mós halo ona sosizalizasaun ba komuniadade afetadu sira iha área postu Administrativu Nain Feto, Vera Cruz, Crsito Rei no Don Aleixa, munisípiu Dili hodi fó kontribuisaun ba implementasaun projetu ne’e.

Komisaun liña ministeriál ne’e, kompostu hosi Ministériu Finansa (MF), Ministériu Justisa (MJ), Ministériu Agrikultura no Peska (MAP), Sekretária Esatdu Protesaun Sivíl (SEPS), ne’ebé prezide hosi Ministériu Obra Públika (MOP), bazeia ba despaisu Primeiru-Ministru, Taur Matan Ruak, ho númeru 034/L/7/2019.

Estudu planu mestre ba drenajen no saneamentu iha kapitál Dili hosi konsultór australianu, hahú serbisu iha tinan 2011 to’o 2012 no iha tinan 2013 to’o 2017,  ne’ebé foin finaliza iha tinan 2019 ho objetivu atu halo planu di’ak ba kanál drenajen sira iha kapitál Dili.

Nune’e mós, iha faze ba planu mestre no dezeñu detalladu ne’ebé mak halo hosi Água de Portugal (AdP), Governu halo ona kustu estimasaun no hahú tama ona faze preperasaun ba prosesu resentimentu.

Projetu sistema drenajen no sanemantu ne’e importante atu hamenus inudasaun no kria ambiente ne’ebé saudável ba abitante tomak iha sidade Dili.

Kustu estimasaun planu mestre ba implementasaun projetu drenajen no saneamentu iha Dili ne’e hamutuk millaun $300-resin, ne’ebé Millennium Challenge Corporation (MCC) apoia fundu millaun $200-resin.

Projetu ne’e hanesan planu asaun ida atu atinje meta Planu Etsratéjiku Dezenvolvimentu Nasionál (PEDN) 2011 to’o 2030, ne’ebé Timor-Leste nia populasaun sai prósperu, saudável, seguru no forte.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here